Mukasakindi w’ imyaka 29 yinjiza arenga miliyoni 4 ku kwezi atazi gusoma no kwandika

Amakuru   Yanditwe na: Nsanzimana Ernest 26 September 2017 Yasuwe: 6416

Umugore witwa Niyonsaba Mukasakindi wo mu murenge wa Mbogo akarere ka Rulindo mu Ntara y’Amajyaruguru, uvuga ko yahoze ari umukozi wo mu rugo, akaba atazi gusoma no kwandika avuga ko yinjiza 4 200 000 buri kwezi ayakuye mu bworozi bw’ inkoko.

Mukasakini w’ imyaka 29 afite abana babiri. Avuga ko yavukiye mu muryango ukennye mu karere ka Nyamagabe bikamwicira inzozi zo kuzavamo umucungamari kuko atabashije kwiga. Ngo ntabwo azi gusoma no kwandika nubwo kuri ubu yubatse inzu ihenze, akaba yaranaguze imodoka ihenze agendamo.

Uyu mugore yatangarije The New Times dukesha iyi nkuru ko ubworozi bw’ inkoko akorera aho atuye mu karere ka Rulindo butuma abona amagi 2000 buri munsi, bukaba bunamwinjiriza miliyoni enye n’ ibihumbi Magana abiri y’ amafaranga y’ u Rwanda buri kwezi.


Mukasakindi abona amagi ibihumbi 2000 buri kwezi

Mu mwaka wa 2004 nibwo Niyonsaba yavuye iwabo mu majyepfo ajya kuba mu karere ka Rulindo mu rwego rwo gushakisha ubuzima, aho yaje kubona akazi ko gukora mu rugo. Nyuma yaje gushaka umugabo, maze nyuma aza kubona uburyo n’umwanya uhagije wo kuba rwiyemezamirimo.

Yagize ati: "Nk’umugore wirirwaga mu rugo, naje kubona ko natakazaga igihe kinini mu rugo nkora uturimo two mu rugo, nza gufata icyemezo cyo gutangira gukora ikintu cyanyinjiriza amafaranga nkabyaza igihe cyanjye umusaruro. Uko niko nagize igitekerezo cyo gutangira ubworozi bw’inkoko."

Uyu mugore avuga ko yafashe igikari cyo mu rugo akaba ari cyo atangira kororeramo inkoko, agatangira afite imishwi itageze kuri 50. Avuga ko ubworozi bw’inkoko kubwinjiramo bitagoye cyane kuko budasaba igishoro gihambaye kandi bukaba butangira kunguka vuba, cyane ko n’isoko ry’amagi mu Rwanda ari rinini cyane.

Muakasakindi yaje gushaka kwagura umushinga we kugirango arusheho kuwugeza ku rwego rushimishije ndetse abashe guhatana ku isoko n’abandi borozi b’inkoko, ariko agira imbogamizi y’igishoro kitari gihagije. Yagerageje kwegera amabanki ngo bamuhe inguzanyo ya miliyoni umunani (8.000.000) ariko barayimwima kuko bamubwiraga ko umushinga we ufite ibyago byinshi byo guhomba.

Yisunze na Unguka Microfinance Bank yari asanzwe abereye umukiriya bamwima inguzanyo, kugeza ubwo ikigega BDF cyaje kwemera kumwishingira kimutiza ingwate maze abasha kubona inguzanyo ya miliyoni ebyiri z’amafaranga y’u Rwanda yahawe na banki.

Ubu abasha kugemurira amagi amasoko agezweho (Supermarkets) yo mu ntara y’Amajyaruguru ndetse akanagurisha amagi ye kuri Nyirangarama ya Sina Gerard ari nawe mukiriya w’imena afite umugurira amagi menshi.

Ubu yavuye ku nkoko 50 yatangiriyeho, yagura umushinga we ubu afite inkoko 6000, biakaba bimufasha kubona umusaruro wamugejeje ku ntera yo kubaka inzu igezweho we n’umuryango we babamo mu karere ka Rulindo, ndetse yabashije no kwigurira imodoka nshya yo mu bwoko bwa Toyota RAV4 ifite agaciro k’amafaranga y’u Rwanda 14.000.000, byose akavuga ko abikesha umutekano n’amahoro yaheshejwe n’ubuyobozi bwiza bwa Perezida Paul Kagame ndetse no kuba ku gihe cy’ubuyobozi bwe harashyizweho ikigega BDF cyamugobotse cyane.

Ubu kandi yakoze ibindi bikorwa bimubyarira inyungu byinshi birimo n’amazu akodeshwa yubatse, kandi ashaka gukomeza kwagura umushinga we kuko arimo no kubaka izindi nzu azororeramo inkoko, akabasha gufatisha neza n’isoko ryo mu karere adakomeje kugemurira amagi abo mu Ntara atuyemo gusa.

N’ubwo avuga ko ubworozi bw’inkoko bubamo imbogamizi zirimo n’uburwayi bwazo, avuga ko bimusaba kumenya ubwoko bw’inkoko zidakunda kurwaragurika ndetse akanazikurikirana cyane kugirango umushinga we utazamo kidobya. Asaba abandi bagore bagenzi be kumenya ko bashoboye kandi ko na bo bagira uruhare mu kwiteza imbere no guteza imbere igihugu, akabasaba ko bashishikarira kugana ibigo by’imari n’amabanki bikabafasha gukabya inzozi zabo.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


  • chat_bubble janvier

    none c ko mutubwiye ko bur kwez yinjiza million enye namaganabiri kdi mukongera ut inkoko ze zitera ibihumbi bibiri by amagi ubwo murumva bihura ubwo igi yaba arigurisha angahe gusa ndacyeka ko habayeho kwibeshya munkuru

    2 weeks ago
  • chat_bubble guy

    afitubimufashamo kuba abona akayabo nkaka kukwezi atazi gusoma no kwandika ni film rwose

    2 weeks ago

Inzindi nkuru

Uganda: Imfungwa irwariye mu bitaro nyuma yo kumira ibihumbi 50 by’...

Sengigwa Sendodie ufungiye mu gihugu cya Uganda arwariye mu bitaro bya...
4 October 2017 Yasuwe: 862 0

Kwa Sebarinda babonye umwana wabo baherukaga muri Jenoside

Sebarinda Leonard n’ umuryango batuye mu murenge wa Ntarama mu Karere ka...
4 October 2017 Yasuwe: 4795 0

U Rwanda na Malawi barimo kwiga ku ngingo yo kohererezanya abakekwaho...

Guverinoma y’ u Rwanda n’ iya Malawi bari mu biganiro biganisha ku gusinya...
3 October 2017 Yasuwe: 607 0

‘Imiyoborere myiza ni ukwegera umuturage ukamenya imibereho ye’...

Guverineri w’ intara y’ amagepfo Mureshyankwano Marie Rose yasuye abaturage...
1 October 2017 Yasuwe: 271 0

Min w’intebe Dr Ngirente yagaragaje inkingi 3 zigize gahunda ya...

Minisitiri w’intebe w’u Rwanda, Dr. Edouard Ngirente kuri uyu wa kabiri...
26 September 2017 Yasuwe: 1645 1

Mukasakindi w’ imyaka 29 yinjiza arenga miliyoni 4 ku kwezi atazi gusoma no...

Umugore witwa Niyonsaba Mukasakindi wo mu murenge wa Mbogo akarere ka...
26 September 2017 Yasuwe: 6416 2