P.Kagame asoje ibikorwa byo kwiyamamaza muri Kayonza aho afite urugo ati “FPR irakomeye”

Amakuru   Yanditswe na: Iyamuremye Janvier 22 July 2017 Yasuwe: 1943

Umukandida wa FPR Inkotanyi, Paul Kagame asoje urugendo rwo kwiyamamaza mu karere ka Kayonza aho afite urugo, mu ijambo rye yakomeje kwitsa cyane ku bufatanye bukwiye kuranga abatuye Kayonza, anashimangira FPR ikomeye bisenderezwa n’ubufatanye bwiza ifitanye n’andi mashyaka akorera mu Rwanda.

Yagize ati “FPR n’ubundi imigambi yayo ni ibyo byose navugaga. FPR irakomeye. FPR ikomezwa kandi no kurushaho n’ukuntu ibana n’abandi banyarwanda bo mu mashyaka yandi ya Politiki twakoranye n’ubundi guhera cyera kugeza ubu.

Amashyaka ya Politiki yandi mu gihugu cyacu umunani yemeye gufatanya na FPR Inkotanyi urugendo rwo kubaka igihugu cyacu ngo gikomere. Turafatanyije, turubakira hamwe, turashaka kujyana na buri wese ntawe dusize inyuma muri ibyo byiza byose twifuriza u Rwanda rwacu.

Ufashe FPR rero ikomeye n’abayoboke bayo, ugashyiraho abayoboke bayo mashyaka umunani yemeye gufatanya na FPR urumva ko inama yarangiye keraaa! Ibindi ni umugenzo tugomba kubahiriza, tukabikora mu mucyo. Banyakayonza ndabasaba ngo mu myaka irindwi izaba ikurikira itariki enye Kanama izaba imyaka irindwi na none y’ubufatanye, y’ibikorwa, y’amajyambere hanyuma mu mutekano usesuye.

Ibisigaye abantu b’abanyarwanda bagiye kera nibagaruka basange u Rwanda atari rwa rundi bigeze bamenya. Abanyarwanda dukeneye gutera imbere, dukeneye imirimo abantu bagomba gukora bose bakagira ikibateza imbere, dukeneye abana bacu ko biga, dukeneye ko bagira ubuzima bwiza, dukeneye buri munyarwanda wese ko agerwaho n’ibimukwiye bimwubaka mu buzima bwe akamererwa neza.”

Yavuze ko ashaka ko abanyarwanda bose bakorera hamwe mbese bakore mu cyerekezo kimwe. Ati “ Twe turashaka gukora,gukorera hamwe, turashaka kwiteza imbere, turashaka imiyoborere myiza, turashaka umutekano, turashaka ubutabera, turashaka demokarasi ishingiye, ibereye ibyifuzo by’abanyarwanda.”

“Turabasa ngo dukomeze dukore, dukore neza, abashoramari bazakomeza gushora imari hano, namwe Abanyakayonza muhaguruke dukore, twivane mu bukene u Rwanda rutere imbere.

Mwansabye gukomeza kubabera umuyobozi, narabyemeye, ibisigaye…nonese mwabisaba nkabyemera hanyuma hakavamo utenguha undi? Itariki enye rero Kanama ngo bite? Ni ukuzinduka izuba rikajya kuva twarangije. Sibyo? Ababara amajwi akaba aribo dusigira imirimo yabo bo bizabatwara umwanya munini kujya kuyabara, kuyarangiza kurusha twebwe gutora.”

Atangira ijambo rye yibukije abatuye Kayonza ko ari umuturanyi wabo ati “Njyewe by’umwihariko turi n’abaturanyi niyo mpamvu nje kubasuhuza ku mugoroba. Rero, Banyakayonza, ibyo mumaze kugeraho ni byinshi. Kayonza iyi mu myaka myinshi yahoraga ari agasanteri gato gusa aho imihanda ihuriramo, imodoka zigahita zigatera abantu ivumbi ariko ubu Kayonza iragenda iba umujyi, iragenda igira bikorwa by’amajyambere, imihanda hafi hano… ari Kayonza, ari Rwamagana mu minsi itari kera, biri hafi kuba imijyi minini ndetse iruta n’umurwa mukuru.”

Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Perezida Lungu ategerejwe I Kigali

Umukuru w’ igihugu cya Zambia Edgar Lungu kuri uyu wa Gatatu tariki 21...
21 February 2018 Yasuwe: 266 0

Umuturage yasabye Uganda kwemerera imfungwa n’ abagororwa gutora

Umuturage wa Uganda yandikiye urukiko rukuru rwa Kampala arugaragariza...
20 February 2018 Yasuwe: 189 0

Abamotari ntibumva impamvu bacibwa amande bakuyeho umugenzi

Abamotari ntibumva impamvu bacibwa amande bakuyeho umugenzi Abamotari...
17 February 2018 Yasuwe: 660 0

Perezida Zuma bamwokeje igitutu ati ‘ntacyo nakoze gituma munyirukana shishi...

None tariki 14 Gashyantare 2018 byari byitezwe ko Perezida Jacob Zuma wa...
14 February 2018 Yasuwe: 516 0

Rusizi: Abantu 20 bafunzwe bakekwaho kuroga harimo uvugwaho kwihindura...

Abaturage barimo abagore n’abagabo bo mu midugudu itanu y’akagari ka Mpinga...
10 February 2018 Yasuwe: 2596 4

Umunya- Canada yitabye Imana bitunguranye avuye gusura ingagi mu...

Umukerarugendo James Trevor wari uvuye mu Birunga yafashwe n’ uburwayi bwo...
9 February 2018 Yasuwe: 3939 0