Pro-Femmes Twese Hamwe yabwiye ibanga abagore bahatanira kuba Abadepite

Amakuru   Yanditswe na: Nsanzimana Ernest 13 August 2018 Yasuwe: 495

Abagore 177 bemerewe na Komisiyo y’Amatora kwiyamamaza mu matora y’Abadepite ateganyijwe muri Nzeri uyu mwaka, babwiwe ko ibanga rizatuma batorwa ari ukwigirira icyizere no kugira intego mu byo bavugira imbere y’inteko itora mu gihe bari kwiyamamaza.

Kuri uyu wa Mbere abakandida bahatanira kuba Abadepite mu Nteko Ishinga Amategeko, baba abigenga, abo mu mitwe ya Politiki ndetse n’abo mu byiciro byihariye, batangiye urugendo rwo kwiyamamaza.

Impuzamiryango Pro-Femmes Twese Hamwe ku bufatanye n’Inama Nkuru y’Igihugu y’abagore ndetse n’abafatanyabikorwa bayo bagiriye inama abagore bemejwe nk’abakandida mu matora y’Abadepite, mu biganiro by’iminsi ibiri bigamije kubunganira mu myiteguro yo kwiyamamaza.

Ibi biganiro byasojwe mu mpera z’icyumweru gishize byari bikubiye mu byiciro bine by’ingenzi aribyo: Ubuyobozi, Uburyo bwo kwiyamamaza, Kuvugira mu ruhame n’Uburyo bwo kwakira neza ibivuye mu matora.

Aba bagore babwiwe ibanga bazakoresha biyamamaza banabwirwa ibanga ry’umuyobozi mwiza ariryo “Kuvuga neza ururimi urimo gukoresha, gukoresha amagambo akomeye kandi avuze byinshi, gukoresha amagambo asanzwe amenyerewe, kudakoresha imvugo isobetse, gukoresha amagambo arata ibigwi.”

Ku bijyanye n’uburyo bwo kwiyamamaza babwiwe ibyo bagomba kuzitwararika birimo ‘Gutegura imigabo n’imigambi bagaragaza ko bahagarariye abaturage, gusobanukirwa itegeko rigenga amatora, kwigirira no kwiyubakamo icyizere, gusuzuma neza ubutumwa utanga ubuhuza na Politiki y’Igihugu, uko ugaragara ku munsi wo kwiyamamaza, gukoresha imvugo isobanutse ngufi yumvwa, kandi irasa ku ntego, kwiyambaza inzego zibishinzwe iyo bibaye ngombwa.”

Aba bagore bibukijwe ko bagomba kuzubahiriza igihe giteganyijwe, kubahiriza amategeko ya Komisiyo y’amatora, gukoresha neza uburyo bw’ihanahanamakuru buteganyijwe (Radiyo, TV, inyandiko ngufi, kwirinda kwirarira no gusezeranya imbaga ibidashoboka, gutega amatwi ibibazo bakubaza no kwibuka gushimira abaguteze amatwi.

Igihe cyanditse ko, Impirimbanyi mu kurwanya ruswa n’akarengane akaba n’Umuyobozi wa Transparency International Rwanda, Ingabire Marie Immaculée, yibukije abagore ikizaba kibajyanye mu nteko.

Ati “Ntimuzaba mugiye gukora ubuvugizi muzaba mugiye gutora amategeko no kugenzura Guverinoma […] mu gihe cyo kwiyamamaza muzabwire abaturage ibyo mugiye kubakorera ntimuzivuge ibigwi sibyo bazaba bakeneye.”

Abagore bahatanira kuba abadepite bitabiriye ibiganiro by’iminsi ibiri babwirwa ibanga bakoresha biyamamaza

Umuyobozi w’Impuzamiryango Pro-Femmes Twese Hamwe, Kanakuze Jeanne d’Arc, yabwiye aba bagore ko igihugu cyabahaye amahirwe bakwiye kuyabyaza umusaruro.

Yagize ati “Icyerekezo cy’ubuyobozi burangajwe imbere na Nyakubahwa Perezida wa Repuburika buha amahirwe angana abanyarwanda bose hagamijwe kugera ku iterambere ribereye bose. ‘Umugore arabishoboye’ by’umwihariko abagore b’abanyarwandakazi bakwiye kubyaza umusaruro amahirwe bahawe n’ubuyobozi bw’Igihugu cyabo.”

Yakomeje asobanura ko ‘Umugore arabishoboye’ ari gahunda yatangijwe n’Impuzamiryango Pro –Femmes Twese mu mwaka wa 2003, aho abagore bifuza kujya mu mu nzego z’ubuyobozi zitandukanye n’abazirimo bahabwa amahugurwa kugira ngo barusheho gutanga umusaruro mu nzego zifata ibyemezo bakoramo.

Uwamahoro Solange, ni umwe mu bavuga ko banyunzwe n’ibiganiro bitandukanye bahawe. Ati “Hari byinshi twungutse tutari tuzi bizadufasha cyane mu gihe cyo kwiyamamaza kandi bizabera impamba abazagira amahirwe bagatorwa.”

Mu Cyumweru gishize Komisiyo y’Amatora yatangaje ko mu bantu 539 batanze kandidatire zabo bashaka kwiyamamaza mu matora y’Abadepite ateganyijwe mu kwezi gutaha, abagera kuri 521 ari bo babyemerewe, abandi 18 barabyangirwa.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Nambajimana wahoze ari padiri yakoze ubukwe n’umukunzi we bagendera mu...

Ku munsi w’ejo taliki ya 15 Kamena 2019,nibwo Nambajimana Donatien wahoze...
16 June 2019 Yasuwe: 3648 0

Gasabo: Umugabo yakubise umuhini umugabo yitaga umujura aramwica

Umugabo witwa Niyigena utuye mu mudugudu wa Kirehe, Akagali ka Nyabuliba mu...
16 June 2019 Yasuwe: 1179 0

Mu Rwanda haravugwa Indwara idasanzwe imaze kugera mu bigo by’amashuri...

Mu Rwanda haravugwa indwara idasanzwe imaze kugera mu bigo bibiri...
15 June 2019 Yasuwe: 7625 0

Perezida Kagame yasubije ibibazo bitandukanye yabazwaga n’urubyiruko birimo...

Perezida wa Repubulika, Paul Kagame yasubije ibibazo bitandukanye yabazwaga...
15 June 2019 Yasuwe: 9139 1

Perezida Kagame yagaragarije abitabiriye inama ya“Eisenhower Fellowoships”...

Ubwo yari mu nama y’Umuryango Mpuzamahanga witwa “Eisenhower Fellowoships”...
14 June 2019 Yasuwe: 634 0

Ibihugu byo mu Karere k’Uburasirazuba byatangarije rimwe imari bizakoresha...

Mu gihe kimwe kuri uyu mugoroba wo kuwa kane tariki 13 ba minisitiri b’imari...
14 June 2019 Yasuwe: 1600 2