Ruhango: Umugabo w’ imyaka 37 akurikiranyweho kwica nyina amutemye

11 January 2017. | Mu Rwanda | 1 Ibitekerezo | Nsanzimana Ernest
  • Ruhango: Umugabo w’ imyaka 37 akurikiranyweho kwica nyina amutemye

Kuri sitasiyo ya Polisi ya Kabagari hafungiwe umugabo witwa Ntihabayo Callixte w’ imyaka 37 y’ amavuko ukekwaho kwica nyina umubyara, umukucecuru w’ imyaka 76.

Uyu mukecuru Mukanyandwi Eliane wari utuye mu murenge wa Bweramana Akagari ka Buhanda ho mu karere ka Ruhango, yishwe mu ijoro ryo kuri ku wa 10 rishyira ku wa 11 Mutarama 2017.

Ngo umuhungu wa Nyakwigendera Ntihabayo Callixte yasanze Nyakwigendera mu nzu amutemesha ishoka mu mutwe ahita yitaba Imana.

Umuvugizi wa Polisi y’ u Rwanda mu ntara y’ Amajyepfo CIP André Hakizimana yabwiye Umuryango ko urupfu rwa Nyakwigendera rwaturutse ku makimbirane ashingiye ku masambu n’ imitungo yari afitanye n’ umuhungu we.

Yagize ati “Ayo makuru niyo, mu ijoro ry’ ejo nibwo umuhungu w’ uriya mukecuru yamusanzwe mu nzu ye amutemesha ishoka mu mutwe arapfa…. Bari bafitanye amakimbirane ashingiye ku mitungo n’ amasambu, ni amakimbirane yari amaze iminsi birumvikana ko umuntu atagera aho yica undi atari amakimbirane amaze igihe”

CIP Hakizimana yavuze ko umurambo wa Nyakwigendera, ku munsi w’ ejo aribwo wajyanywe mu bitaro bya Gitwe ngo ukorerwe isuzuma abaganga bemeze icyateye urupfu rwe.

Polisi ivuga ko uretse uyu muhungu wa Nyakwigendera nta wundi muntu yigeze ita muri yombi.

Polisi kandi yongera kwibutsa Abanyarwanda ko ubwicanyi ari bubi igasaba abafitanye amakimbirane ko bajya begera ubuyobozi bukafasha kuyakemura hatabayeho kwicana.

Ibitekerezo
  • MyPassion

    jalia
    12 January 2017 - Musubize

    ibi nibyo Musenyeri yavuze Evode ashaka kumutera amabuye.ubu se aracyategereje ko musenyeri ashaka ngo ikibazo afite kigire ishingiro?

Tanga Igitekerezo