Umugenzuzi w’imari ya Leta mu karere ka Rutsiro, mu ntara y’Iburengerazuba, Bizimungu Jean Damascene, yatawe muri yombi akurikiranyweho icyaha cyo kwakira ruswa y’amafaranga y’u Rwanda miliyoni enye.

Sponsored Ad

Umuvugizi w’urwego rw’igihugu rushinzwe ubugenzacyaha,Mbabazi Modeste yabwiye ikinyamakuru Ukwezi ko aya makuru y’itabwa muri yombi rya Bizimungu Jean Damascene ari impamo ndetse ngo ibyaha akurikiranyweho, yabikoze mu ijoro ryo kuwa Kabiri tariki 28 Gicurasi 2019, ahagana saa mbiri n’igice.

Ukwezi kwavuze ko hari amakuru avuga ko umugenzuzi w’imari ya Leta mu rwego rw’igihugu rw’amakoperative (RCA) witwa Hitayezu Innocent wari umaze ibyumweru bibiri akorana na Bizimungu Jean Damascene mu kugenzura koperative yitwa KOPAKAMA, ari we watanze amakuru y’uko bagiye guhabwa ruswa, nyuma y’uko uyu Bizimungu yari amuzaniye miliyoni ebyiri kuri izo miliyoni enye yahawe.

Ibi ngo byebereye mu kabari kitwa Amahumbezi gaherereye mu mudugudu wa Kabiraho, mu kagari ka Bumba mu murenge wa Mushubati wo muri ako karere ka Rutsiro. Ngo uyu Bizimungu yaje kureba Hitayezu Innocent amusanga mu cyumba araramo amuha ibaruwa irimo miliyoni 2, amubwira ko ayahawe na HAKIZIMANA Frederic wahoze ari umuyobozi mukuru (CEO) muri Koperative ya KOPAKAMA ngo bamworohereze mu igenzura barimo kumukorera. Uyu wahoze ayobora iyi Koperative nawe ngo arimo gushakishwa.

Mbabazi Modeste uvugira RIB, avuga ko Leta yahagurukiye kutajenjekera na gato abakora ibyaha bimunga ubukungu bw’igihugu, bityo inzego zitandukanye zikaba ziri maso kuburyo uzajya wibeshya wese amategeko azamuhana. Mbabazi Modeste avuga ko kuba nk’umugenzuzi w’imari ya Leta yaba ari we wakira ruswa ngo ye kugaragaza ukuri, ari ibintu bibabaje ariko amategeko agomba kumukurikirana.

Inkuru ya Ukwezi.rw