Kigali

Aba Perezida ba Afurika bemeje kunoza ubumwe no gufasha abimukira muri Libya

Amakuru   Yanditswe na: Iyamuremye Janvier 30 November 2017 Yasuwe: 1031

Inama yahuzaga Afurika n’Uburayi yasoje imirimo yayo ku gicamunsi cyo kuri uyu wa kane i Abidjan muri Cote d’Ivoire abari bayiteraniyemo biyemeje gukemura ibibazo byihutirwa birimo icy’abanyafurika b’abimukira bo mu gihugu cya Libya.

Mu biganiro byabereye muri iyi nama, Perezida wa Repubulika y’ u Rwanda Paul Kagame yaragaragaje ko ishyirwa mu bikorwa ry’amavugurura y’umuryango w’Afurika yunze ubumwe azafasha mu iterambere ry’Abanyafurika muri rusange, ibintu anemeza ko bizanagabanyiriza umutwaro abafatanyabikorwa b’umugabane wa Afurika.

Iyi nama yari iya 5 ihuje ibihugu bigize umuryango wa Afrika yunze ubumwe n’iby’umuryango w’ubumwe bw’i Burayi. Yigaga ku bufatanye bw’impande zombi. Mu ijambo yagejeje ku bari bateraniye muri iyi nama, Perezida w’u Rwanda Paul KAGAME yagaragaje ko nk’abaturanyi bahoraho, imigabane yombi ifite byinshi biyihuza kandi igomba gufatanya, ashimangira ko ikibazo cy’abimukira bo muri Libya ari ikizamini gikwiye kwerekana igipimo cy’ubu bufatanye hagati y’Afurika n’Uburayi.

Iki kibazo cy’abimukira bo mu gihugu cya Libya, cyafatiwe ingamba, kuko Leta ya Morocco yatanze indege zo gucyura abari mu nkengero z’umurwa mukuru Tripoli, ndetse hanashyirwaho itsinda ryihariye rigiye kugikurikirana, nk’uko byagarutsweho na Perezida wa Guinee Prof. Alpha Condé, ari nawe uyoboye umuryango w’Afurika yunze ubumwe muri iki gihe.

Ati, " Perezida Macron yatubwiye ko umwami wa Maroc yemeye gutanga indege akaziha itsinda ryahawe izo nshingano, ibintu twanishimiye, kuko bigaragaza ko Afurika itagitegereza ko byose biva ahandi ahubwo ko natwe hari ibyo ubwacu dushoboye. Twanasabye ko umuryango w’ubumwe bw’Uburayi nawo ushingira ku nkunga ya Maroc maze mu buryo bwihutirwa tugahita dutwara bariya bimukira 3800 bari mu nkengero z’ikibuga cy’indege. Twanabwizanyije ukuri, muri Libya nta Leta ihari, n’ikimenyimenyi bariya 3800 bari mu nkengero za Tripoli. Buri gihugu gifitemo umuturage twemeje rero ko cyoherezayo umuntu utanga ibyangombwa kuri buri wese bimwemerera kwinjira mu gihugu kandi ibyo bigomba guhita bishyirwa mu bikorwa. Hanyuma tuzabone gukomereza no mu zindi nkambi kandi ni aka kanya ntitugomba gutegereza."

Icyerekezo cy’ubufatanye bugiye kuranga Afurika n’’Uburayi mu gihe kiri imbere nabwo bwahawe umurongo mushya nk’uko bisobanurwa na Perezida wa komisiyo y’umuryango w’ubumwe bw’Uburayi Jean Claude Juncker. Yagize ati, "Icya mbere navuga ni uko ubufatanye hagati y’Afurika n’Uburayi ari magirirane, kubera ko twembi Abanyafurika n’abanyaburayi tunganya agaciro. Imyaka yarahise ubwo abanyaburayi bazaga guha abanyafurika amasomo, ariko icyo gihe cyarahise! Ntabwo twazanywe no guha amasomo inshuti zacu z’abanyafurika, gusa nanone natwe ntitwaje ngo bayaduhe, ahubwo icyo tuvuga ni ubufatanye magirirane."

Imibare yo mu mwaka wa 2015 igaragaza ko Uburayi bwakoze ishoramari rya miliyari 32 muri Afurika, mu gihe 41% by’ibyo Afurika yohereza hanze bijya mu Burayi.

Inama ihuza Afurika n’Uburayi, iba rimwe mu myaka 3, iyi yaberaga i Abidjan muri Cote d’Ivoire ikaba yabaga ku nshuro ya 5 ari nayo ya mbere ibereye munsi y’ubutayu bwa Sahara.
RBA



Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Uruzinduko rwa Perezida Lungu rusigiye iki u Rwanda

Perezida wa Zambia Edgar Lungu wasoje uruzinduko rwe i Kigali yatangaje ko...
22 February 2018 Yasuwe: 658 0

Kongera ibyo kurya bigenewa impunzi za Kiziba ntibiri hafi aha

Ishami ry’umuryango w’abibumbye ryita ku mpunzi (UNHCR) rirahamagarira...
22 February 2018 Yasuwe: 754 1

Uganda: U Rwanda ruhagarariwe na Minisitiri Musoni mu nama y’ abakuru b’...

Musoni yahagarariye Perezida Kagame mu mwiherero w’abakuru b’ibihugu bya EAC...
22 February 2018 Yasuwe: 1336 0

Perezida Kagame yakiriye mugenzi we Edgar Lungu [AMAFOTO]

Kuri uyu wa Gatatu, tariki ya 21 Gashyantare 2018 Perezida Paul Kagame...
21 February 2018 Yasuwe: 1650 0

Guverineri Mureshyankwano yakomoje ku gafuti yakoze ari umwana yibuka...

Ni umunyapolitiki uzwiho ubuhanga bwo kuganiriza abaturage ayobora abaha...
20 February 2018 Yasuwe: 4218 0

U Rwanda ntirutewe ubwoba n’igitutu cya Amerika isaba kugarura...

Leta y’U Rwanda yatangaje ko ititeguye kugarura ubucuruzi bwa...
19 February 2018 Yasuwe: 1399 0