Kigali

Kuba AU yari ibeshejweho n’inkunga z’amahanga byatumaga ikora ibibereye abaterankunga-Kagame

Amakuru   Yanditswe na: Iyamuremye Janvier 23 September 2017 Yasuwe: 445

Perezida wa Republika Paul Kagame avuga ko amavugurura y’umuryango wa Afurika yunze ubumwe yari akwiye kuko imikorere myiza y’uyu muryango idafitiye inyungu abanyafurika gusa ahubwo no ku bandi batuye indi migabane. Ibi umukuru w’igihugu yaraye abivugiye mu kiganiro yatangiye mu kigo Brookings Institution giherereye i Washington D.C muri Leta Zunze Ubumwe za Amerika, ku butumire yahawe na Perezida w’iki kigo, Strobe Talbott.

Ni ikiganiro cyagarutse ku mavugurura y’Umuryango wa Afurika yunze Ubumwe, aho president Kagame yasobanuye ko kuba uyu muryango wari ubeshejweho n’inkunga z’amahanga ku kigero cya 97% byatumaga udakora ibibereye abanyafurika, ahubwo ugakora ibibereye abaterankunga.

Ati "Ibi ntabwo bisobanutse ku mpande zombi. Inyungu za Afurika zirimo kwibona mu bikorwa, zaratakaye, ahubwo inyungu z’abaterankunga ziba arizo zimakazwa.”

Perezida Kagame, yakomeje ashimangira ko kurambiriza kuri iriya nkunga nta burambe bifite bitewe n’impinduka zikomeje kwigaragaza mu ruhando rwa politiki no mu bukungu bw’Isi, kuko gushingira ku nkunga z’amahanga zishobora kuvaho igihe icyari cyo cyose.

Cyakora, Perezika Kagame yasobanuye ko mu rwego rwo guharanira ukwigira kwa Afurika hashyizweho itsinda ry’impuguke zirimo Umunyarwanda Donald Kaberuka ngo zishakishe ahandi hatari mu baterankunga hava ubushobozi bwafasha umuryango w’afrika yunze ubumwe hatabayeho kwishingikiriza ku bufasha bw’amahanga.

Yasobanuye ko ubu buryo bukomoka ku mukoro abakuru b’Ibihugu bya Afurika mu myaka ibiri ishize bahaye Dr Donald Kaberuka, Acha Leke, Carlos Lopes n’abandi wo gushaka uburyo uyu mugabane wakoresha ngo ubone ubushobozi bwo gutera inkunga ibikorwa bya AU ndetse n’ikigega cy’amahoro.

Ibi byavuyemo igitekerezo cyemerejwe mu nama ya AU yabereye i Kigali muri Nyakanga 2016, y’uko buri gihugu kizajya gitanga 0.2% by’umusoro w’ibikinjiramo akajya gutera inkunga ibikorwa by’umuryango.

Perezida Kagame ni we watowe n’abandi bakuru ba za Leta na Guverinoma zibumbiye mu muryango wa Afurika yunze Ubumwe ngo ayobore amavugurura yawo.

Aya mavugurura ngo arimo guhindura byinshi kuko Afurika irimo gukorana mu cyizere, mu nyungu za buri wese no mu muhate udasanzwe hagamijwe kubaka Isi itekanye kandi iteye imbere.

Brookings Institution ni ikigo kidaharanira inyungu kiba i Washington D.C, gikora ubushakashatsi bwimbitse bugamije gushaka ibitekerezo bishya byasubiza ibibazo umuryango mugari ufite yaba ku rwego rw’igihugu, akarere, n’isi muri rusange.

RBA

Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Umuryango Sinapisi Rwanda wigeze kwakira ubutumwa buvuye kuri George W....

Umuryango Sinapisi Rwanda kuri uyu wa 9 Ukuboza 2017 wizihije imyaka 25...
10 December 2017 Yasuwe: 1124 3

Perezida Kagame ari ku rutonde rw’ abafite ijambo rikomeye muri...

‘New African Magazine’ ku rutonde rwayo ngarukamwaka rw’ Abanyafurika 100...
8 December 2017 Yasuwe: 619 0

Misiri: P.Kagame yagaragaje ko hakwiye kwitabwa ku mpano z’abaturage

Perezida wa Repubulika Paul Kagame ari Sharm-El-Sheikh mu Misiri aho...
7 December 2017 Yasuwe: 296 0

Akari ku mutima wa Nsengimana na Musafiri bakuwe muri Guverinoma

Ku mugoroba wo kuwa gatatu tariki ya 06 Ukuboza 2017 nibwo Perezida wa...
7 December 2017 Yasuwe: 3750 0

Perezida Kagame yakuyeho Minisitiri w’Uburezi n’uw’ikoranabuhanga

Kuri uyu wa gatatu tariki ya 06 Ukuboza 2017 Perezida wa Repubulika y’u...
6 December 2017 Yasuwe: 1692 0

Ibyemezo byafatiwe mu nama y’Abaminisitiri idasanzwe yabaye kuri uyu wa...

None kuwa Kabiri tariki ya 5 Ugushyingo 2017, Inama y’Abaminisitiri...
5 December 2017 Yasuwe: 2626 0