Min. Stella Ford Mugabo anenga abakoresha imvugo ‘Ibifi binini’ akavuga ko ari ugusebya igihugu

27 December 2016. | Politiki | 10 Ibitekerezo | Nsanzimana Ernest
  • MyPassion

Minisitiri Stella Ford Mugabo avuga ko ahora yumva itangazamakuru rihamya ko hari ibifi binini binyereza umutungo wa Leta bidakurikiranwa, akibaza impamvu nta mumyamakuru n’umwe uragira igifi yerekana.

Kuri uyu muminisitiri ushinzwe imirimo y’Inama y’Abaministiri muri Guverinoma y’u Rwanda, abona ko guhora itangazamakuru rivuga ibintu bidafite gihamya ari ugusebya ubuyobozi bw’Igihugu.

Minisitiri Stella yagize ati “Hari ikintu gikunda kuvugwa cyane mu banyamakuru muri ibyo byo kunyereza umutungo ko bafata abatoya abanini ntibafatwe, ariko rikaba iryo jambo gusa, sinzi abanini muvuga abo ari bo. Cyangwa ikimenyetso kibigaragaza gihari. Ariko iyo ibintu bikomeje kuvugwa tugerageza gukurikirana haba mu bushinjacyaha ariko ntiturabona ibimenyetso ku muntu w’umuyobozi wenda minisitiri wicara muri komite itanga amasoko, agatuma ifata icyemezo cyangwa se wa wundi mutoya akavuga ati ‘dore runaka ni we wansabye gukora ibi kandi dore yabishyize mu nyandiko.”

Yunzemo ati “Nkaba nasabaga (izina ry’umunyamakuru wari umubajije), niba anafite umuyobozi azi yamuvuga hano tukamukurikirana. Nk’uko Nyakubahwa Perezida yabidusabye, iyo uzi icyaha aho kiri ukaba uzi n’umuntu runaka mwerekane, kuko gukomeza kubivuga bitanga igishushanyo kibi ku buyobozi bw’igihugu no ku Rwanda . Nta n’umwe muri umwe ujya ugira uwo yerekana.”

Uyu muyobozi yakomeje agira ati “Mwanegera n’abo batoya bafunze niba yaragikoranye n’umuyobozi, minisitiri runaka cyangwa DG runaka akabivuga.”

Minisitiri Stella Ford avuga ko mu gukurikirana ibyo bibazo abayobozi babifitemo uruhare bahanwa, aho ngo abo batabonye bigahora bivugwa gusa ntacyo bimaze uretse gutanga izina ribi ku Rwanda.

Ati “Abo tutabonye bikaguma mu magambo gutya biratugora kugira ngo ibibazo bikurikiranwe. Ariko inzego zirahari, ni yo mpamvu Ibiro by’Umugenzuzi w’Imari ya Leta byagiyeho, ibyo bagaragaje, Umushinjacyaha Mukuru arabikurikirana, ibitari mu bushinjacyaha, bikemukira mu bigo, ariko iyo mvugo ihora igaruka iterekana gihamya numva yatanga izina ribi ku buyobozi bw’Igihugu kandi bidafite ishingiro.”

Minisitiri w’Imari n’Igenamigambi, Amb Gatete Claver, avuga ko koko hari abantu bakigaragaraho kunyereza umutungo wa Leta ariko akemeza ko inzego zubatswe ndetse n’amategeko ahari kugira ngo ubigizemo uruhare wese akurikiranwe.

Ku kibazo kijyanye n’amafi manini Minisitiri Gatete yagize ati “Mbere ba minisitiri ni bo bafataga icyemezo bagasinya za sheke akanatanga n’isoko. Tuza kuvugurura ririya tegeko ry’ingengo y’imari, dushyiraho abashinzwe ingengo y’imari bakuru n’ibyo bagomba gukora, inshingano za minisitiri zirazwi, muri iryo tegeko, inshingano za PS cyangwa n’abandi bashinzwe ingengo y’imari mu bigo bya Leta zirazwi n’inshingano z’utunama tw’amasoko zirazwi, byose birasobanutse. Ndetse hari n’amateka ya minisiteri abisobanura anabaha n’ubwo bubasha. Noneho icyiza cyabyo ni uko buri muntu wese inshingano zigenda zigaragara. Iyo tuvuga ngo amafaranga yanyerejwe, tuba tuvuga ngo ni nde wagombaga gukora iki? Niba ari mu gutanga amasoko, ni nde ufite ubwo burenganzira butangwa n’amategeko.”

Uyu muyobozi avuga ko ubu batakiri mu rujijo ngo kuko byakorewe aha ngaha ni kanaka wenda w’umuyobozi kuko aba afite inshingano zumvikana cyane ziteganywa n’amategeko, ndetse ngo hakaba hari n’inzego zibafasha gucukumbura ibyo bibazo, Ibiro by’Umugenzuzi w’Imari n’Urwego rw’Umuvunyi.

Avuga ko izo nzego zikora akazi kazo, ngo iyo zirangije raporo zose, agahamya ko ubushinjacyaha ari bwo bukurikirana ahagaragaye ibibazo.

Ubwo yagiranaga ikiganiro n’abanyamakuru muri Nyakanga 2015, uwahoze ari Umushinjacyaha Mukuru, Richard Muhumuza yasobanuye ko raporo y’umugenzuzi w’imari ya Leta iba ari raporo gusa. Ngo ntabwo kiba ari icyemezo cy’ubushinjacyaha cyatangwa mu rukiko. Avuga ko iyo bayihawe bayisoma bakayisesengura bakarebamo ibigize icyaha bakabona kubikoramo idosiye.

Ati “Niba nta bimenyetso byerekanwa bigaragaza ko umuntu runaka yagize uruhare mu kunyereza cyangwa gukoresha nabi umutungo wa Leta, ubwo twahera he dukurikirana uwo muntu?”

Nubwo abakozi ngo bahuguwe banahawe ubushobozi, Minisitiri Gatete avuga ko bitabuza ukora amakosa kuyakora ariko agakurikiranwa..

Ku bijyanye n’amafi manini, Minisitiri Gatete ahamya ko nta muntu uri hejuru y’amategeko mu Rwanda.

“Ubwo ni ukuvuga ngo n’umunyamakuru, ko musanzwe mucukumbura inkuru, kuba wagenda nubwo waba udafite ibimenyetso byose ukavuga uti nkurikije ibyo nabonye nkurikirana ibi n’ibi n’ibi, nsanze Gatete yari afitemo uruhare muri ibi ngibi, ayo makuru Umushinjacyaha Mukuru aiheraho, noneho agakora iperereza ryimbitse kugira ngo abone ibimenyetso. Ariko kubivuga gusa ntacyo bifasha ntituzi uwo ari we, ntituzi uwagize ate?”

“Bariya bajya kwisobanura imbere ya PAC, barasobanura uko byagenze noneho PAC na yo itanga raporo yayo, iyo raporo na yo umushinjacyaha cyangwa undi uwari we wese ni yo aheraho kuko baba bacukumbuye bakabaza bagakurikirana. Noneho ibyo birafasha umuntu akavuga ngo ubu ni uburangare cyangwa yabikoze abigendereye cyangwa yari bifitemo inyungu cyangwa ni kanaka.”

Ni kenshi Urwego rw’Umuvunyi rwagiye rubazwa n’abadepite impamvu hadakurikiranwa abo biswe ibifi binini, na rwo rukemeza ko bigora gukurikirana abantu nk’abo aho usanga imitumgo berekana iba idahuye n’iyabo nyakuri, aho ngo usanga baba barayanditse kuri bene wabo.

Sr: Izubarirashe

    Facebook Twitter Addthis
Ibitekerezo
  • MyPassion

    mucyo
    29 December 2016 - Musubize

    Ariko ye abivuge arare mu maboko ya Police ahimbirwe ibyaha. Ibyo ntawe utabizi kurindira ngo uzabona minister muri committee itanga amasoko ntabyo uzabona kuko akoresha abandi kdi izo nyungu niwe ubona agatubutse. Ubundi kugaragaza ko bakora bagahimbira ku dufi duto rimwe na rimwe tuba twabuze udufaranga twi intica ntikize kdi za miliyoni bo bazimize kera none ngo urashaka ibindi bimenyetso keretse niba utabona cg ngo wumve hera muri ministeri urimo urabibona cg nawe ubyiboneho

  • MyPassion

    Hussein
    28 December 2016 - Musubize

    Ubwo se Stella yasanze uwamize isoko n;ikibanza by’akarere ka RUBAVU ari igifi gitoya ? Ubu se RSSB yanyerejwe n’igifi gitoya,? ubwo musing wa Kalisimbi wanyerejwe n’igifi gitoya ? Ahubwo ndumva inyito y’ifi mutayishaka mujye mubita AMASIHA MANINI

  • MyPassion

    Hussein
    28 December 2016 - Musubize

    Ubwo se Stella yasanze uwamize isoko n;ikibanza by’akarere ka RUBAVU ari igifi gitoya ? Ubu se RSSB yanyerejwe n’igifi gitoya,? ubwo musing wa Kalisimbi wanyerejwe n’igifi gitoya ? Ahubwo ndumva inyito y’ifi mutayishaka mujye mubiri AMASIHA MANINI

  • MyPassion

    alfa
    28 December 2016 - Musubize

    Minister njye ntitubyumva kimwe. Ibyo bifi birahari ndetse amaraporo y’umugenzuzi w’imari arabyerekana. Ndetse na PAC hari ibyo itumiza ntibibashe kwisobanura. Urashaka ibihe bimenyetso niba urugomero rumara imyaka cumi na... Barateganyaga itarenze itatu? Uragira ngo nyarucari atunge agatoki big boss bazagace. Mureke itangazamakuru ribandike nibatanakurikiranwa wenda hari uwagira isoni akabireka. Murakoze

  • MyPassion

    uwajeneza jean de Dieu
    28 December 2016 - Musubize

    nta miti yasaziye muri stock ya RBC nti byaguzwe mumisoro y’abaturange none NGO ibifi binini NGO ntitukanivuge tuzabivuga naneho uzababara azabivuge

  • MyPassion

    citoyen
    28 December 2016 - Musubize

    Nyamara ibyo aba bayobozi bavuga ni ukuri. Kuvuga ibigambo gusa nyamara nta kimenyetso na kimwe utanga bihinduka ibihuha no gusebanya. Ariko abanyamakuru bagiye badukorera icukumbura (investigation), bagakusanya za gihamya zifatika, ibyo "bifi" byafatwa, bitaba ibyo rubanda ikabona ko Leta ibikingiye ikibaba. Naho kubivuga gusa muri rusange nta nyungu.

  • MyPassion

    Kwitonda
    28 December 2016 - Musubize

    Hahhh, ubuse abaguze ziriya Generators zakorehejwe mu ntambara ya 2 y’ isi zishaje kurusha Muzehe Mpyisi bakurikiranywe nande? izo machine se ntibyagaragarako zishaje? Itekinika ryanyu rirakabije.

  • MyPassion

    amazina
    27 December 2016 - Musubize

    Ha rya Mama Eminente yayajyanaga he?

  • MyPassion

    ruti
    27 December 2016 - Musubize

    ubwo se koko ucyerekanye warara he

  • MyPassion

    BOSCO
    27 December 2016 - Musubize

    LES COCHONS DOIVENT ETRE APPELER PAR LEURS NOMS COCHONS.IBIVUGWA NUKO BIHARI.

Tanga Igitekerezo