Kigali

Ntaribasoba ngo yumvise aruhutse ubwo Nguzumubira yiregaga ko ariwe wamwiciye umwana

Amakuru   Yanditswe na: Nsanzimana Ernest 20 April 2018 Yasuwe: 1450

Umukecuru witwa Adele Ntaribasoba n’ umugabo witwa Nguzumubira Gabriel babanye nk’ abavandimwe nyamara muri Jenoside yakorewe abatutsi Nguzumubira yishe umwana wa Ntaribasoba ubu babana mu ishyirahamwe bakanafashanya nk’ abavukanyi.

Aba bombi ni abo mu kagari ka Bunyoni umurenge wa Kivumu mu karere ka Rutsiro. Ubwo baganiraga n’ itangazamakuru kuri uyu wa 18 Mata 2018 barigaragarije ko babanye neza babihamisha guhoberana bagaragaza ko nta mbereka irimo.

Nguzumubira avuga ko nyuma yo gucengerwa n’ ijambo ry’ Imana n’ inyigisho z’ ubumwe n’ ubwiyunge yigishirijwe muri gereza yiyemeje kwirega ibyo yakoze.

Yagize ati “Muri gereza aho twabaga twabanje kumenya Imana, turahindukira twirega imbere y’ Imana gusa bidahagije ahubwo tugomba gusaba imbabazi kugira ngo n’ uwahemukiwe umubiri w’ uwe uboneke”

Nguzumubira avuga ko ubwo yiregaga muri Gacaca nta mbigamizi zariho, ndetse ngo bataha yatashye asa n’ uwisanga kuko yari yarahawe imbabazi n’ uwo yahemukiye.

Ati “Kubera kwiga ijambo ry’ Imana numvaga ko usabye imbabazi azihabwa. Twazaga muri gacaca tugatanga ubuhamya nabo bakagira ibyo batuvugaho natashye numva nta mpugenge mfite”

Ntaribasoba w’ imyaka 65 avuga ko yasomye bibiliya agasanga abahemukiye abatutsi muri Jenoside yakorewe abatutsi bakwiye guhabwa imbabazi agahitamo kumubabarira.

Yagize ati “Yanyiciye umwana ariko twakurikiye bibiliya tukumva ko ubwami buzatera ubundi, ko ishyanga rizatera irindi, ko abantu bazicana ntacyo bapfuye. Ubwo rero maze gukurikira bibiliya ndavuga nti uzansaba imbabazi nzazimuha.”

Yakomeje agira ati “Twageze muri gacaca ngize Imana arabyemera kuko abantu benshi bari barabimushinje, naramukunze mpita numva ndaruhutse ndavuga nti nibagucyure uge kwibyarira njyewe nta mbyaro nsigaje”

Ntaribasoba na Nguzumubira baba mu ishyirahamwe ry’ abarokotse Jenoside yakorewe abatutsi n’ ababiciye. Iri shyiramwe bavuga ko ryatumye barushaho kubohoka kuko bahura bakaganira, bakanakora ibikorwa bibateza imbere. Abari muri iri shyirahamwe borozanyije inka ubu muri bose uko ari 20 nta wubarimo utarahabwa inka.

Iri shyirahamwe Umurava ryatangiye mu myaka ibiri ishize ritangizwa n’ abantu 11 nk’ uko Perezida waryo Muziranenge Emmanuel yabitangarije itangazamakuru.

Ntaribasora avuga ko we na Nguzumubira babanye nk’ abavandimwe ndetse ko iyo umwe agize ubukwe cyangwa ikibazo mugenzi we amufasha.

Yagize ati “Ubu tubanye amahoro, nkoresha ubukwe akaza avuga ati ngiye kwa mama, n’ ikimenyimenyi mu kwezi gushyize nacyuje ubukwe atwerera igaziye ya Fanta. Naramwandikiye nti murumuna wawe agiye gusezerana atwerera igaziye ya Fanta tubanye neza, ngira ikibazo cy’ amafaranga akayampa nta kibazo”

Ibipimo by’ ubumwe n’ ubwiyunge mu Rwanda kigeze kuri 95% kuko byagaragajwe n’ ubushakashatsi mu mwaka ushize wa 2017.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


  • chat_bubble Alice

    Niko NGUZUMUBI ibyo wa mukomere ibikorewe wowe izo mbabazi wazitanga? Niba ubwenge bwaragarutse butakiri aho mwari mwarabutaye 1994 izo mbabazi uzihe agaciro wibaza uti arinjye wabikorewe NAZITANGA?

    1 month ago

Inzindi nkuru

Akarere ka Ruhango kabonye meya mushya

Njyanama y’akarere ka Ruhango iherutse kweguza nyobozi yose y’aka karere...
25 May 2018 Yasuwe: 2161 0

Rwakazina atorewe kuba meya mushya w’ umujyi wa Kigali

Inama Njyanama y’ umujyi wa Kigali itoreye Marie-Chantal Rwakazina w’ imyaka...
25 May 2018 Yasuwe: 2300 0

U Rwanda nyuma yo guca amashashi, pulasitiki zikoreshwa rimwe nazo...

Leta y’ u Rwanda yatangiye guca ikoreshwa ry’ amacupa ya pulasitiki mu biro...
25 May 2018 Yasuwe: 1254 0

Umuyobozi Mukuru wari ushinzwe imirimo rusange mu mujyi wa Kigali yasezeye...

Mugabo Vianney wari Umuyobozi Mukuru ushinzwe imirimo rusange mu mujyi wa...
24 May 2018 Yasuwe: 3988 0

Nyabihu: Gitifu w’umurenge yakiriye umukecuru umutwaro w’inkwi

Ndandu Marcel, Umunyamabanga Nshingabikorwa w’Umurenge wa Rurembo mu Karere...
24 May 2018 Yasuwe: 5856 2

Mushikiwabo yavuze impamvu agiye kwiyamamariza kuyobora Francophonie kandi...

Minisitiri w’ Ububanyi n’ amahanga n’ Umuryango w’ Afurika y’ Iburasirazuba Mme...
24 May 2018 Yasuwe: 1790 0