Mu masaha y’umugoroba kuri uyu wa 04 Nzeri 2017, Polisi y’u Rwanda yakuye mu rugo Diane Rwigara, murumuna we Anne Rwigara n’umubyeyi wabo, Adeline Rwigara.
Ni nyuma y’uko mu gitondo cyo kuri uyu munsi batumijwe mu bugenzacyaha bakanga kwitaba. Polisi yafashe umwanzuro wo kubakura mu rugo rwabo ku ngufu kugira ngo bitabe ubugenzacyaha. Ku wa 03 Nzeri, mu itangazo Polisi y’Igihugu yashyize hanze, ACP Theos Badege yasobanuye ko umuryango wa Rwigara udafuze ahubwo ko icyabaye ari ugusaka urugo (...)

Sponsored Ad

Mu masaha y’umugoroba kuri uyu wa 04 Nzeri 2017, Polisi y’u Rwanda yakuye mu rugo Diane Rwigara, murumuna we Anne Rwigara n’umubyeyi wabo, Adeline Rwigara.

Ni nyuma y’uko mu gitondo cyo kuri uyu munsi batumijwe mu bugenzacyaha bakanga kwitaba. Polisi yafashe umwanzuro wo kubakura mu rugo rwabo ku ngufu kugira ngo bitabe ubugenzacyaha.

Ku wa 03 Nzeri, mu itangazo Polisi y’Igihugu yashyize hanze, ACP Theos Badege yasobanuye ko umuryango wa Rwigara udafuze ahubwo ko icyabaye ari ugusaka urugo rwabo.

Kugira ngo Polisi y’Igihugu ibashe kwinjira mu rugo rwabo byayisabye gukoresha urwego kugira ngo ibashe kurira igipangu kuko igipangu cyari gikinze. Abapolisi barenga 15 berekeje mu Kiyovu ahatuye Umuryango wa Diane Rwigara.

Nyuma yo gukomanga igihe kinini bafashe umwanzuro wo kwifashisha urwego kugirango binjire imbere mu gipangu, umupolisi umwe yinjiye maze afungurira n’abandi nk’uko amashusho yafashwe na RBA abigaragaza.

Nyuma abapolisi baje kujya mu gipangu imbere bakoresheje ingufu, basangamo Diane Rwigara n’abandi bari mu nzu imbere mu gikari; basanze ibintu byose biteye hejuru hari imyenda irunze mu ruganiriro.

Umupolisi wari uyoboye iki gikorwa witwa CSP Jean de Dieu Kabare yahise abereka impapuro zibata muri yombi uko ari batatu, bahita babajyana
ku biro bishinzwe iperereza (CID) kugira ngo bazahatwe ibibazo.

Musaza wabo we yashatse kujyana n’abandi yinjira mu modoka ya Polisi bamuvanamo bamubwira ko we ntacyo bamukurikiranyeho bityo batamukeneye.

Umuvugizi wa Polisi y’Igihugu, ACP Theos Badege avuga ko umuryango wa Rwigara uregwa kunyereza imisoro kubera ikompanyi y’uwo muryango itarayishyuye, yanavuze kandi ko nta rimwe bigeze bemera ko uyu muryango waburiwe irengero.
.
Ati “Twe twavugishaga ukuri, twabwiraga abantu ukuri uko kumeze. Icyo twategereje ni ugukoresha amategeko kuko itegeko riteganya ko umuntu ahamagarwa kuri polisi kwisobanura ibyo abazwaho. Byarakozwe, bahawe ubutumire bwo kwitaba kuri polisi inshuro eshatu. Amategeko ateganya ko iyo bigenze gutyo umuntu agasuzugura amategeko hatangwa urupapuro rundi rutuma polisi izana umuntu ku gahato.”

Diane Rwigara ubwe, polisi imukurikiranyeho kwereka Komisiyo y’Amatora imikono y’abantu bavugwa ko bapfuye, igihe yifuzaga kuba umukandida ku mwanya wa Perezida wa Repubulika mu matora yabaye muri Kanama.

Diane Rwigara yavuzweho gukoresha inyandiko mpimbano ubwo yashakaka kwiyamamariza umwanya w’Umukuru w’Igihugu mu matora aheruka aho amwe mu mazina y’abamusinyiye Komisiyo y’Amatora yavuze ko harimo n’abari bamaze igihe barapfuye.

Ku mugoroba wo ku itariki ya 07 Nyakanga 2017 nibwo Komisiyo y’amatora mu Rwanda, NEC yatangaje abakandida batatu ntakuka bemerewe kwiyamamariza umwanya wa Perezida w’u Rwanda aribo Paul Kagame w’umuryango FPR-Inkotanyi, Frank Habineza w’ishyaka Democratic Green Party n’umukandida w’igenga Philippe Mpayimana.

Ni mu gihe Gilbert Mwenedata, Barafinda Sekikubo Fred na Diane Shima Rwigara batamerewe kwiyamamaza bitewe n’uko hari ibyangomba batujuje harimo imikono 600 y’abantu bagomba kubasinyira.

Abo uko ari batatu ntibemerewe kandidatire kubera ko hari byinshi babura mu byobasabwaga ariko Diane Rwigara we arino umwihariko ko primo n’abapfuye.
Mu mikono y’abantu 572 Diane Rwigara yatanze, NEC yakuza ko yatahuyemo ko mu bamusinyiye bo mu Karere ka Gasabo harimo abantu batatu bapfuye mu gihe gishize.

Abo akaba ngo yard uwitwa Innocent Maniraguha, Desiré Byiringiro na Augustin Rudahara; nkuko Perezida wa NEC, Prof. KALISA MBANDA yabitangaje.

NEC icyo gihe yatangaje ko uwitwa Augustin Rudahara yapfiriye mu bitaro bya Kibagabaga ku itariki ya 16 Mata 2016, ashyingurwa mu irimbi rya Busanza, mu mva zitubakiye.

Rudahara ni nimero ya 471 mu gitabo cyo ku irimbi rya Busanza.

Mu rwego rw’amategeko, ingingo ya 609 ivuga ko ‘umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu kugeza ku myaka irindwi.

Iki gihano cyiyongeraho ihazabu y’amafaranga y’u Rwanda kuva ku bihumbi 300 kugeza kuri miliyoni eshatu. Ingingo ya 610 yo iteganya ko ‘umuntu wese uzi ko inyandiko ari impimbano, akayikoresha ku buryo ubwo ari bwo bwose ahanishwa ibihano bimwe n’iby’uwayihimbye’, bisobanuye ko n’ababasinyishirije bashobora kurebwaho.

Nta gihe kinini gishize kandi uruganda rw’Umuryango wa Rwigara rufunzwe nyuma yo gukekwaho kunyereza imisoro.