Ubuhamya bw’ umugore w’ imyaka 30 uvuga ko yahoze mu buraya ubu akaba yarabiretse

12 January 2017. | Ubukungu | 0 Ibitekerezo | Nsanzimana Ernest
  • Ubuhamya bw’ umugore w’ imyaka 30 uvuga ko yahoze mu buraya ubu akaba yarabiretse

Nadine Musabyimana ni umubyeyi w’ abana batatu utuye mu murenge wa Kanombe akarere ka Kicukiro, avuga ko yakoze umwuga w’ uburaya imyaka 11, ibintu avuga ko byamugizeho ingaruka zirimo no kubyara abana batatu ku bagabo batatu.

Musabyimana avuga ko yatangiye umwuga w’ uburaya afite imyaka 16 y’ amavuko, ngo yazengurukaga mu bice bitandukanye by’ umujyi wa Kigali ashaka abakiriya, akabashakira no mu murenge wa Kanombe atuyemo.

Avuga ko yabonaga ko kwishora mu buraya aricyo kizamufasha kubona imibereho, kuko atari afite akazi kandi afite ibibazo bya buri munsi agomba guhangana nabyo.

Musabyimana avuga ko ubuzima bwe butari bworoshye igihe yakoraga uburaya bitewe n’ ibyago avuga ko ababukora bahuriramo nabyo birimo kubyara abana batabiteganyaga kandi bakababyara badahuje ba se, guhohoterwa, kubaho batagira icyizere cy’ ejo hazaza, kubyara abana bakabajugunya n’ ibindi.

Yagize ati “Ubuzima bwari bugoye. Iyo uri indaya ufatwa nabi n’ abiyita za makiliya, ubaho nabi mu buzima buzira umunezero. Nk’ umuntu wakoraga uburaya nabonye amabi menshi, ababyeyi babyara abana bakabata ku miryango bibwira ko umugiraneza azatoragura uwo mwana akajya kumurera n’ ibindi”

Mu myaka ushize wa 2016, Musabyinama avuga ko aribwo yaje kugira amahirwe yo guhura na mama pasiteri Chantal Nyirakinyana, arimo gushakisha abakora umwuga w’ uburaya ngo abahe ubufasha.

Ati “Nyirakinyana, yaraje anyigisha ijambo ry’ Imana anambwira ko hari amahirwe y’ ukuntu nareka uburaya nkakomeza kurera abana banjye. Yabwiye kuri gahunda ye yo gufasha abakora umwuga w’ uburaya niyandikisha mu ba mbere”

Musabyimana ni umwe mu bagore n’ abakobwa 50 bahoze mu buraya basoje amahugurwa y’ amezi icyenda aho bigishijwe gukora imitako itandukanye no kudoda.

Ati” Ngitangira amahugurwa nahise nsezera uburaya, batwigishije gukora imitako no kudoda, batwigisha ijambo ry’ Imana ubu nakiriye agakiza”

Avuga ko agiye kubyaza umusaruro ubumenyi yungukiye muri aya mahugurwa, gusa ngo ategereje guhabwa ibikoresho kandi atanabihawe yakora uko ashoboye akabyigurira.

Nyirakinyana wafashije aba bahoze mu buraya yishimira ko inzozi ze yazigezeho.

Yagize ati “Aba bagore bari baratakaje icyizere cy’ ejo hazaza bibaza uko bazabaho igihe baretse umwuga wabo, ariko twemeranyije ko batazawusubiramo ko ahubwo bagiye gukora cyane bakiteza imbere ubuzima bugahinduka”


Rose Nyirandimubenshi, umwe mu bagore bahuguwe yerekana ibyo bize gukora

Yongeraho ko arimo gushaka abaterankunga kugira ngo bagure ibikoresho, hanyuma aba bagore bakorere hamwe muri koperative. Ngo ibi bizabafasha gutanga umusaruro utubutse kandi banabone isoko mu buryo buboroheye.

Umunyamabanga nshingwabikorwa w’ inama y’ igihugu y’ abagore, Jacqueline Kamanzi Masabo, yashimye iyi gahunda avuga ko agiye gukora ubuvugizi muri Leta kugira babone ibikoresho. Yongeraho ko Leta irajwe ishinga no gushaka uburyo abakora uburaya bose babuvamo bagakora imirimo isobanutse bakava mu cyo yise ubucakara.

Src: TNT

Tanga Igitekerezo