Kigali

Umunyarwanda w’ imyaka 19 yakoze progaramu yifashishwa n’ abacuruzi b’ amata

Amakuru   Yanditswe na: Nsanzimana Ernest 16 September 2017 Yasuwe: 1236

Mugiraneza Abdullah wo mu murenge wa Rutare mu karere ka Gicumbi, amaze guca uburiganya n’urwikerwe rwarangwaga hagati y’aborozi, abacunda batwara amata n’amakusanyirizo ; abakorera uburyo bahanahana amakuru binyuze mu ikoranabuhanga.

Uyu musore w’imyaka 19 ntiyize mu mashuri ahambaye kuko yize amwe bita nayini, kuri GS Kirwa mu murenge wa Rutare, nyuma aza gukomereza i Save muri St Kizito mu ishami rya Computer Electronics rijyanye no gukanika ibyuma bikoresha amashanyarazi (radio, frigo, mudasobwa, amapasi, micro-onde, …) bitajyanye no gukora porogaramu za mudasobwa.

Nyamara ngo kubera gukunda gushakisha kuri interinet, yabashije gukora iyi gahunda ubusanzwe yigwa n’abo muri Computer Sciences/Informatique.

Porogaramu yaciye uburiganya n’urwikekwe mu bucuruzi bw’amata

Mugiraneza uvuka mu rugo rw’aborozi, ngo yitegereje amakimbirane ya hato na hato hagati y’abacuruza amata, ashaka umuti urambye wayo.

Ubusanzwe ngo hari ikibazo cy’amata ava ku mworozi agashyikirizwa abayatwara ku magare bitwa ‘Abacunda’,nabo bakayageza ku ikusanyirizo MCC (Milk Collection Centre). Ibi ngo ni nako byagendaga ku mafaranga, MCC yahaga amafaranga abacunda ngo bayageze ku borozi babahaye amata,kuko amakusanyirizo ari kure y’aborozi, kandi bose batabona umwanya wo kujyana umukamo wabo ku ikusanyirizo, kuko benshi aba ari muke.

Amakimbirane yavukaga umworozi abonye amafarnga make agereranije n’amata yohereje, maze umucunda akamubwira ko « amata yapfuye cyangwa yabogotse ».

Mugwaneza agira ati, « nahoraga nitegereza uburyo papa ahora yitotomba, mfata umwanzuro wo gushaka umuti. Nabonaga hatarimo ikoranabuhanga, nta mucyo kandi rimwe na rimwe baribwaga ».

Porogaramu MCC Management yayikoze mu gihe cy’amezi abiri, ubundi itangira gukoreshwa ku ikusanyirizo rya Rutare aho avuka, aborozi barayishimira.

Ati, « ubu nta rwikekwe byose binyura mu mucyo, kuko amata yakiriwe, umworozi ahita ahabwa ubutumwa kuri telefoni, akamenya niba hari ayapfuye cyangwa yabogotse, akanamenya amafaranga azishyurwa ».

Anavuga ko umworozi utanyuzwe yohereza ubutumwa asobanuza bakamusubiza, cyangwa akaza kubivugana n’umucunda aje gutwara andi mata.

Ubu Gicumbi yose irakoresha MCC Management

Nk’uko bitangazwa n’umuyobozi w’akarere ka Gicumbi wungirije ushinzwe iterambere n’ubukungu, Muhizi Jules Aimable, ngo iyi porogaramu igomba kugera mu makusanyirizo arenga icumi mu karere ka Gicumbi.

Muhizi ati, « uriya mwana yize amashuri yisumbuye gusa, kandi si biriya yize. Yarangije icyiciro cya mbere mu mashuri ya gahunda y’uburezi y’imyaka 9 na 12 y’ibanze, i Kirwa muri Rutare. Nyuma yiga i Save mu bisa n’ubukanishi (Electronic),aje akora iyi porogaramu. Ubu nibwo yitegura kujya muri Kaminuza i Tumba. Twabonye ari nziza dusaba n’andi makusanyirizo kuyikoresha ».

Umwe mu borozi bakorana na IAKIB, Karuhije Karoli, yari aherutse gutangariza Bwiza dukesha iyi nkuru ko abacunda babarembeje , bavuga ko amata yapfuye.

Ati, « uyamuha ari mazima, nimugoroba akakubwira ko basanze apfuye, kandi atanayagaruye. Nyuma y’iyi gahunda, n’ayapfuye umusaba kuyagarura, kuko iyo yakiriwe uhita ubona ubutumwa muri telefoni ».

Mugwaneza we avuga ko amakusanyirizo arindwi ari mu gice cy’ubuganza yose amaze kuyikoresha,mu mirenge ya Rutare, Muko, Rwamiko, Giti, Bukure na Nyamiyaga.

Anavuga ko Koperative IAKIB ikorera mu mirenge 19, ifite icyicaro mu murenge wa Kageyo, ifitemo amakusanyirizo 6 yose ari muri gahunda yo gukoresha MCC Management. Gusa ngo haracyari aborozi badafite telefoni, bityo ngo IAKIB ikaba iteganya kuzibagurira, ubundi bakajya banazishyurirwaho bitabafashe umwanya.

Mugiraneza Abdullah, avuga ko yamaze ukwezi kose azindukira I Byumba(avuye iwabo i Rutare, mu birometero 30, aho yafataga moto y’ibihumbi bine kugenda no kugaruka), akahirirwa ashakisha kuri internet. Yamaragaho amasaha umunani, yishyura amafaranga 300 buri saha.

Ngo yanyuze mu ndimi nka PHP, J.Query, na CSS(Cascading Style Sheet), byose araremekanya akoramo porogaramu yuzuye.

Gusa ngo aramara impungenge urubyiruko rwitinya ko ikoranabuhanga rishoboka, kandi rifite akamaro. Arahamagarira ba rwiyemezamirimo mu nzego zinyuranye gukoresha ikoranabuhanga kuko ridahenze kandi ryoroshye, bakanamenya ko mu Rwanda hari abaribagezaho, maze bikoroshya akazi, binimakaza gukorera mu mucyo.

Mu karere ka Gicumbi ku gihe cy’imvura haboneka litiro zisaga ibihumbi 70 ku munsi, bakaba bafite gahunda yo kubaka uruganda ruyatunganya ku buryo yajya anoherezwa hanze y’igihugu,nk’uko na Guverineri mushya w’intara y’amajyaruguru Gatabazi JMV abyizeza abatuye iyi ntara.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Umunyemari Bapfakurera yatorerwe kuba Perezida w’ urugaga rw’...

Umucuruzi w’ umushoramari Robert Bapfakurera niwe watorewe kuba Perezida w’...
23 February 2018 Yasuwe: 616 0

Kigali: Polisi ifunze abasore babiri bafatanywe amafaranga y’amahimbano

Ku itariki ya 18 Gashyantare 2018, Polisi y’u Rwanda ikorera mu karere ka...
20 February 2018 Yasuwe: 305 0

Rwamagana: Bafatanywe amapaki 900 y’amasashi ya Pulasitiki atemewe...

Polisi y’u Rwanda ikorera mu karere ka Rwamagana ku itariki ya 14...
17 February 2018 Yasuwe: 271 0

Kigali: Afungiye kwiba moto akoresheje urufunguzo rw’urucurano

Polisi y’u Rwanda ikorera mu mujyi wa Kigali ifunze uwitwa Nubahumpatse Jean...
16 February 2018 Yasuwe: 496 0

Ruhango: Yatawe muri yombi aha ibihumbi 200 Rwf umupolisi ngo amufashe mu...

Umusore w’imyaka 23 ukomoka mu murenge wa Mukingo, mu karere ka Nyanza,...
15 February 2018 Yasuwe: 1171 1

Ibiciro by’amata byazamuwe mu gihugu hose

Guhera tariki ya 13 Gashyantare, 2018 Minisiteri y’ubucuruzi n’inganda mu...
14 February 2018 Yasuwe: 2097 1