Isomwa ry’umwanzuro w’urukiko rw’ubujurire kuri Lt Joel Mutabazi wahoze ari mu barinda umukuru w’igihugu ryari riteganyijwe uyu munsi ryasubitswe, uku gusubikwa kubaye ku nshuro ya kane kuva mu kwezi kwa gushize, impamvu itangwa ni ubunini bwa dosiye.

Sponsored Ad

Isomwa ryarwo ubu ryimuriwe tariki 22 z’uku kwezi nk’uko umunyamakuru wa BBC uri ku rukiko abivuga.

Lt Mutabazi, ufatwa nk’ukuriye abo bareganwa, yakatiwe gufungwa burundu ahamijwe ibyaha umunani birimo kugambirira kugirira nabi umukuru w’igihugu, iterabwoba no gukorana n’imitwe y’ingabo itemewe na Leta. Ibyaha we yahakanye.

Uru rukiko kandi rwasubitse isomwa ry’umwanzuro ku bujurire bwa Frank Rusagara na Col Tom Byabagamba wari ukuriye abarinda Perezida Paul Kagame naryo ryari riteganyijwe uyu munsi kuwa gatanu.

Aba bombi nabo bajuririye igifungo cy’imyaka 21 kuri Col Byabagamba na 20 kuri Rusagara wigeze kuba perezida w’urukiko rwa gisirikare mu Rwanda.

Bombi bahamijwe n’urukiko rwa gisirikare ibyaha birimo; kwangisha rubanda ubutegetsi, gusebya ubutegetsi no guhisha ibimenyetso.

Isomwa ry’umwanzuro ku bujurire bwabo ryimuriwe tariki 29 z’uku kwezi.