Umuyobozi w’ ikinyamakuru ‘Rwanda Focus’ yasabiwe gufungwa by’ agateganyo

11 January 2017. | Ubutabera | 0 Ibitekerezo | Nsanzimana Ernest
  • Umuyobozi w’ ikinyamakuru ‘Rwanda Focus’ yasabiwe gufungwa by’ agateganyo

Kuri uyu wa gatatu tariki 11 Mutarama 2017, Umunyamakuru, akaba n’ umuyobozi w’ ikinyamakuru ’ Rwanda Focus’ Shyaka Kanuma yagejejwe imbere y’ urukiko aburana ku ifungwa n’ ifungurwa, ubushinjacyaha bumusabira gufungwa iminsi 30 y’ agateganyo

Ubushinjacyaha bwabwiye urukiko ko Kanuma ukurikiranyweho ruswa n’ ibyaha bifitanye isano nayo aramutse arekuwe byabagamira ibimenyetso, bwongeraho ko ubwo yafatwaga yari atorotse.

Shyaka Kanuma ashinjwa gukora no gukoresha inyandiko mpimbano no kutishyura umusoro. Ubushinjacyaha bwavuze ko yahataniye isoko mu kigo gishinzwe gusezerera no gusubiza mu buzima busanzwe ingabo zavuye ku rugerero binyuze mu buriganya ndetse ko hari n’imisoro ya 65 256 589 Frw atishyuye.

Kanuma yireguye avuga ko mu itangazamakuru harimo ibibazo bikomeye byatumye atekereza uburyo bwose bwatuma atsindira isoko. Yanemeye ko hari imisoro atishyuye ariko ngo byatewe n’ibibazo ikigo cye Focus Media Ltd cyarimo, ku buryo hari gahunda yo kugisesa.

Yemereye imbere y’inteko iburanisha ko hari sheki yasinye akohereza kopi muri Komisiyo ishinzwe gusezerera no gusubiza mu buzima busanzwe ingabo zavuye ku rugerero hanyuma umwimerere wazo ukaguma mu biro bye.

Gusa mu kwiregura yavuze ko yafashwe atagiye gutoroka kuko atari afunzwe asaba ko yakwemererwa kuburana ari hanze, ati "ubu noneho ndi kuburanishwa nta hantu nzajya."

Iburanisha rirakomeje mu Rukiko Rwisumbuye rwa Gasabo.

Tanga Igitekerezo