Minisiteri y’Ubuzima yatangaje ko mu bipimo 1,848 byafashwe kuri uyu wa 31 Ukwakira 2020 byemeje ko abantu batatu banduye COVID-19 mu gihe undi umwe yayikize.

Sponsored Ad

Umubare w’abamaze kwandura COVID-19 mu Rwanda ugera kuri 5,137 mu gihe, mu gihe abamaze kuyikira ari 4 879. Abakirwaye ni 223 naho abapfuye akaba ari 35.

Iri tangazo rya Minisiteri y’Ubuzima rigaragaza ko aba barwayi batatu bavuye I Kigali:1, Nyagatare:2.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Amerika yagize abanduye Covid-19 bashya batari munsi ya 94,000 mu masaha 24 ashize, hagaragara ukwiyongera cyane muri leta zimwe, mu gihe habura iminsi ngo amatora ya perezida abe.

Ubaye umunsi wa kabiri wikurikiranya iki gihugu gica umuhigo wari usanzweho ku munsi w’ubwandu bwinshi bushya.

Ku wa kane, muri Amerika hatangajwe abarwayi bashya barenga 91,000.

Muri Amerika hamaze gutangazwa abantu bose hamwe barenga miliyoni 9 banduye coronavirus, nkuko imibare ya Kaminuza ya Johns Hopkins ibigaragaza. Muri bo abarenga 229,000 imaze kubica.

Umurepubulikani Donald Trump n’umudemokarate Joe Biden bazakiranurwa n’amatora yo ku wa kabiri.

Leta 21 - muri 50 zigize Amerika - zirimo kugaragaramo ukwiyongera kw’iki cyorezo, zimwe mu izo kirimo kwibasira cyane zikaba amajwi yazo ari yo yitezweho kuba ingenzi cyane mu kugena uzatsinda amatora y’uyu mwaka.

Muri leta ya Wisconsin iba ari isibaniro mu matora, ibitaro byo mu mujyi wa Green Bay byaburiye ko mitingi ya Perezida Trump y’ejo ku wa gatanu muri uwo mujyi ishobora gutuma ubu bwandu bushya burushaho kwiyongera.

Mu itangazo rihuriweho ibitaro byinshi byasohoye, byagize biti:

"Ubu ni bwo ari ingenzi cyane kurusha mu kindi gihe cyabayeho kwirinda ibivunge by’abantu, cyane cyane hano i Green Bay muri Wisconsin, aho turimo kubona kumwe mu gukwirakwira kwihuse cyane kwa Covid-19 muri Leta Zunze Ubumwe [z’Amerika]".

Ejo ku wa gatanu, mbere yuko mitingi yateganyije ziba, Bwana Trump yanditse kuri Twitter ati:

"Gupima kurushaho bihwanye no kwiyongera kw’abasanganwa ubwandu. Dufite uburyo bwa mbere bwiza cyane bwo gupima. Impfu [ziri] HASI CYANE".

Muri mitingi za Trump zo mu bihe bya vuba bishize, abazitabiriye barapimwe ndetse bahabwa udupfukamunwa. Zanakorewe hanze mu kwirinda icyorezo cya Covid-19.

Ariko muri izo mitingi ntabwo hubahirijwe guhana intera hagati y’umuntu umwe n’undi, ndetse bamwe mu bashyigikiye Trump bakomeje kutambara udupfukamunwa.

Bwana Biden na we yakomeje ibikorwa bye byo kwiyamamaza, uretse ko mitingi ze zo zikurikiza amabwiriza yo guhana intera, nk’urugero agahitamo ko abazitabira bamwe baguma mu modoka zabo.