skol
fortebet

Abantu 122 banduye Covid-19 mu Rwanda abandi 21 barayikira

Yanditswe: Wednesday 16, Dec 2020

Sponsored Ad

Minisiteri y’Ubuzima yatangaje ko uyu munsi tariki ya 16 Ukuboza 2020,abantu 122 basanzwemo ubwandu bwa COVID-19 mu bipimo 2,561 byafashwe, mu gihe abandi bayikize mu masaha 24 yashize.

Sponsored Ad

Abanduye basanzwe I Kigali: 64 (Abagenzi binjira mugihugu, bahise bashyirwa mu kato), Musanze: 38 (Amatsinda y’abibasiwe), Huye: 7, Nyagatare: 5, Rusizi: 3, Muhanga: 2, Nyamagabe: 2, Karongi: 1.

Kuva ku wa 14 Werurwe 2020 ubwo umurwayi wa mbere yabonekaga mu Rwanda abantu 6,954 banduye.

Abantu 6,057 bamaze gukira covid-19 ndetse barasezerewe nyuma yo gupimwa bagasangwa nta bwandu bagifite mu mibiri yabo mu gihe 840 bakiri kwitabwaho.Abamaze gupfa ni 57.

Kugeza ubu nta muti n’urukingo bya Coronavirus biragera mu Rwanda, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Umuvugizi wa Polisi y’u Rwanda, CP John Bosco Kabera, yakebuye abarenga ku mabwiriza yashyizweho n’inzego z’ubuzima hagamijwe kwirinda Covid-19, abibutse ko bashobora gucika polisi ishinzwe kugenzura ishirwa mu bikorwa ryayo ariko ko badashobora gucika iki cyorezo.

Ibi CP Kabera yabigarutseho kuri uyu wa Kabiri mu kiganiro yagiranye na RBA, cyibanze ku iyubahirizwa ry’ingamba nshya n’izavuguruwe zashyizweho n’Inama y’Abaminisitiri yateranye ku wa Mbere mu kwirinda ikwirakwira rya Covid-19.

CP Kabera yavuze ko Abanyarwanda bakwiye kubahiriza amabwiriza yo kwirinda Covid-19 batabikoreye ko polisi ibareba.

Ati “Ndangira ngo twibutse abaturarwanda bose ko ari ngombwa kubahiriza aya mabwiriza badakoreye ku ijisho rya polisi kuko iyo uvuga ko ucitse polisi ntabwo uzacika Coronavirus, niba wavuze uti njyewe nabihishe nagiye mu kabari nagiye hehe ariko noneho ndabacitse Coronavirus ntabwo uzayicika.”

CP Kabera yakomeje avuga ko polisi yiteguye gukomeza gutanga umusanzu wayo mu kugenzura uko aya mabwiriza yubahirizwa.

Ingamba zo kurwanya ikwirakwira rya Covid-19 zakajijwe nyuma y’uko bigaragaye ko ubwiyongere bw’iki cyorezo buri gufata indi ntera. Mu minsi 14 ishize, mu gihugu hamaze kwandura abantu barenga 700 mu gihe abamaze gupfa bo ari batandatu. Ni umubare munini ugereranyije n’uko ubwandu bwari bumeze mu minsi ishize.

Mu kiganiro cyatambutse kuri Televiziyo Rwanda ku wa 13 Ukuboza 2020 kigaruka ku ngamba zo gukumira ikwirakwira ry’iki cyorezo, Minisitiri w’Ubuzima, Dr Ngamije Daniel, yatangaje ko mu byumweru bibiri bishize, hagaragaye ubwandu ku kigero giteye inkeke aho nk’umubare w’ubwandu ku wa Gatandatu wageze ku bantu 100, ku Cyumweru nabwo ukaba 131, umubare waherukaga muri Kanama ndetse impfu zikiyongera aho abantu batanu bapfuye mu cyumweru kimwe.

Icyo gihe Umuvugizi wa Polisi, CP John Bosco Kabera, we yavuze ko mu mezi icyenda ashize iki cyorezo kigeze mu Rwanda, nta gihe na kimwe cyigeze kibaho ngo usange abantu barenze ku mabwiriza yo kwirinda Covid-19 nk’uko bimeze muri iki gihe.

Ati “Bivuze ko abantu barushijeho kudohoka, kutubahiriza amabwiriza, iki gihe birakomeye nta n’ikindi gihe byigeze bibaho. Biragaragaza ko hari abantu bisabira ibihano, barasaba ko hakwiye gukazwa ingamba kurusha izari zisanzwe. Yaba ari izijyanye n’amasaha y’ingendo n’abantu bitabira ibikorwa bitandukanye, aho bigaragaye ko hari serivisi zirenga ku mabwiriza zikaba zahagarikwa aho bibaye ngombwa.”

Inama y’Abaminisitiri yashyizeho ingamba nshya zigamije gukumira ubwiyongere bw’icyorezo cya Coronavirus, zirimo ko amasaha y’ingendo yavuye saa Yine z’ijoro agashyirwa saa Tatu mu minsi ya mbere gato ya Noheli, mu gihe mu bihe by’iminsi mikuru bwo zizaba zibujijwe guhera saa Mbili z’umugoroba kugera saa Kumi z’igitondo.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa