Minisiteri y’Ubuzima yatangaje ko uyu munsi tariki ya 06 Ukuboza habonetse abanduye Covid-19 bashya 45 barimo aba Kigali: 16, Musanze: 21, Rusizi: 3, Nyagatare: 2, Rubavu: 2&Muhanga: 1.

Sponsored Ad

Abamaze kwandura iki cyorezo bose kuva cyagera mu Rwanda kuwa 14 Werurwe 2020 ni 6,129.

Uyu munsi nta muntu n’umwe wakize Covid-19 mu Rwanda byatumye umubare w’abamaze gukira iki cyorezo bose baguma ari 5,696. Abakirwaye ni382.
Abapfuye bose:51.

Coronavirus ni indwara itarabonerwa umuti cyangwa urukingo ndetse mu kwita ku wayanduye havurwa ibimenyetso byayo birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru.

Umunsi w’ejo tariki 5 Ukuboza 2020, wabaye umunsi wa gatatu wikurikiranya Leta Zunze Ubumwe za Amerika zibona abarwayi bashya benshi ba Coromavirus, aho kuri iyi nshuro habonetse abarwayi bashya bagera ku bihumbi 230.

Imibare yatangajwe na Johns Hopkins University igaragaza ko kuri uwo umunsi abantu bapfuye bishwe na Coronavirus ari 2,527.

Hashize iminsi muri Amerika, kimwe mu bihugu bya mbere byibasiwe na Coronavirus habonetse ubwiyongere bukabije bw’abandura iyo ndwara n’abo ihitana.

Inzego z’ubuzima muri icyo gihugu zari zatanze umuburo nyuma y’aho miliyoni z’abanyamerika bakoze ingendo zitandukanye mu cyumweru gishize, bizihiza umunsi mukuru w’amashimwe uzwi nka Thanksgiving.

Mu byumweru bibiri bishize, AFP yatangaje ko abantu bicwa na Coronavirus muri Amerika buri munsi bagiye barenga ibihumbi bibiri.

Umubare w’abarwayi bari mu bitaro kubera coronavirus nawo wagiye wiyongera muri Leta zituwe cyane nka California, Florida, New York na Texas.

Muri rusange, Amerika imaze kugira abantu banduye Coronavirus basaga miliyoni 14.6, mu gihe abo icyo cyorezo cyahitanye basaga ibihumbi 181.