skol
fortebet

Abantu 6 bo mu mujyi wa Kigali bahitanwe Covid-19 ku munsi wa nyuma wa 2020

Yanditswe: Thursday 31, Dec 2020

Sponsored Ad

Kuri uyu wa Kane tariki 31 Ukuboza 2020, abantu 6 bahitanywe na COVID-19 bituma umubare w’abamaze kwicwa n’iki cyorezo uba 92 mu gihe abanduye bo biyongereyeho 133 bose hamwe baba 8,383 mu bipimo 4,332 byafashwe.

Sponsored Ad

Amakuru yatangajwe na Minisiteri y’Ubuzima agaragaza ko abitabye Imana barimo abagore 2 barimo uw’imyaka 38 na 40 bo mu mujyi wa Kigali.Hari kandi abagabo 4 b’imyaka 52,57,62,71nabo ba Kigali.

Abarwayi bashya babonetse I Kigali : 97, Musanze : 24, Rubavu: 6, Huye: 3, Muhanga: 2, Kamonyi: 1

Uyu munsi hakize abantu 173 mu masaha 24 ashize bituma umubare w’abamaze gukira bose uba 6,542 naho abakirwaye ni 1,749.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Nk’uko byari byitezwe na benshi, leta y’u Bushinwa yemeje ikoreshwa ry’urukingo rwa Coronavirus rwakozwe n’ikigo cy’Abashinwa kizobereye mu gukora imiti cya Sinopharm, nyuma y’uko igerageza rya gatatu ry’ubushobozi bw’urwo rukingo rigaragaje ko rushobora gukingira Coronavirus ku kigero cya 79%.

U Bushinwa bwemeje uru rukingo nyuma y’amagerageza yakozwe mu bihugu bigera mu 10 hirya no hino ku Isi, byiganjemo ibyo muri Amerika y’Epfo ndetse n’Uburasirazuba bwo Hagati, bitewe n’uko ubwandu bwa Coronavirus bwagabanutse cyane mu Bushinwa. Iki gihugu ariko na cyo kimaze gukingira abantu barenga miliyoni eshatu imbere mu Bushinwa, kandi abenshi nta bibazo by’ubuzima bagize.

Urukingo rwemejwe ni rumwe mu nkingo ebyiri ziri gukorwa na Sinopharm, rukaba rudakenera kubikwa ahantu hakonje cyane kandi rutwarika mu buryo bworoshye, ibituma rushobora kuzashakwa cyane n’ibihugu bikiri mu nzira y’amajyambere.

Leta Zunze Ubumwe z’Abarabu (UAE) yari iherutse kwemeza uru rukingo, icyo gihe ikaba yaravuze ko rushobora kurinda Coronavirus ku kigero cya 86%.

Inzego z’ubuzima mu Bushinwa zivuga ko kugera muri Gashyantare umwaka utaha, iki gihugu kizaba kimaze gutanga inkingo miliyoni 50 ku baturage bacyo, mu gihe Sinopharm ivuga ko ifite ubushobozi bwo gukora inkingo miliyari imwe zose mu mwaka utaha.

U Bushinwa kandi busanzwe bufite izindi nkingo eshatu ziri gukorwa, aho byitezwe ko zishobora kwemezwa mu minsi iri imbere.

Hari andi makuru avuga ko leta y’u Bushinwa izakoresha uru rukingo mu gukuza igitinyiro cyayo ku ruhando mpuzamahanga, ndetse no gufasha ibihugu bikennye kubona uru rukingo mu buryo bworoshye, ibizatuma isura y’u Bushinwa yangijwe n’ibirego by’uko iki gihugu ntacyo cyakoze mu kugerageza guhangana n’’ikwirakwira rya Coronavirus mu ntangiriro yayo ihinduka.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa