Minisiteri y’Ubuzima yatangaje ko uyu munsi tariki ya 26 Ugushyingo 2020, abantu 72 basanganywe ubwandu bwa Coronavirus, mu gihe abandi 28 bayikize,mu bipimo 2,991 byafashwe mu masaha 24 yashize.

Sponsored Ad

Abarwayi bashya basanzwe Kigali: 6, Rwamagana: 30 (Bapimwe muri Gereza ya Rwamagana), Nyamagabe: 19 (Bapimwe mu nkambi ya Kigeme ), Musanze: 9, Nyanza: 2, Gicumbi: 2, Bugesera: 2, Rubavu: 2.

Umubare w’abamaze kwandura Coronavirus kuva umurwayi wa mbere agaragaye mu Rwanda ku wa 14 Werurwe 2020, bamaze kuba 5,851 mu bipimo 617,258 bimaze gufatwa.

Abamaze gukira bagasezererwa ni 5,345 mu gihe 459 bakiri kwitabwaho n’abaganga.Abamaze gupfa ni 47.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Mu kiganiro Umunyamabanga wa Leta muri Minisiteri y’Ubuzima, Dr Mpunga Tharcisse, yagiranye na The New Times, yavuze ko hari icyizere ko mu gihe cya vuba urukingo rwa Covid-19 rushobora kuboneka.

Ati “Hari inkingo nyinshi za Covid-19 zerekanye ubushobozi n’ubwo zikiri mu igerageza zitaremezwa ko abantu batangira kuzikoresha, birerekana ko turi hafi kubona urukingo, kuko nicyo kintu gikenewe mu guhangana na Covid-19 yibasiye isi yose.”

Yongeyeho ati “Nk’igihugu ubu turi muri Covax Framework, ihuririo rigamije kwihutisha kugeza urukingo rwa Covid-19 mu bihugu binyamuryango igihe ruzaba rubonetse. Kuri ubu turi gushakisha miliyoni 15$ azakoreshwa tugura urwo rukingo ubwo ruzaba rubonetse.”

Dr Mpunga yavuze ko abazaherwaho mu guhabwa urukingo ubwo ruzaba rubonetse, ari abantu bibasiwe kurusha abandi barimo abakora mu nzego z’ubuzima, abageze mu zabukuru, ndetse n’abandi basanzwe bafite ibibazo by’ubuzima.

Ati “Icyiciro cya mbere kizaba icyo gukingira 30% y’abaturage bose, hanyuma uko igihe kigenda tuzagenda dupima n’abandi b’ingenzi barimo abapolisi ndetse n’abanyeshuri.”

Avuga uko Covid-19 ihagaze kugeza ubu mu Rwanda, Dr Mpunga yavuze ko ahari kugaragara ubwandu cyane kuri ubu ari ahantu hahuriye abantu benshi mu nkambi z’impunzi no muri gereza, ndetse ngo isangwa no mu bacuruzi bambukiranya imipaka.

Yavuze ko hatahita hamenyekana uko Covid-19 yageze muri za gereza, kuko ngo gereza zitari mu ruzitiro burundu nk’uko umuntu yabitekereza.

Ati “Hari abagororwa bajya kwivuza hanze, hari abagororwa bashya binjira bavuye hanze, hari abagemura ibicuruzwa muri gereza bavuye hanze, ndetse hari n’abakora muri gereza bataha hanze, ibi rero bishobora kuba impamvu yo kwinjiza Covid-19, kandi yageramo igahita ikwirakwira cyane bitewe n’uburyo baba ari benshi ahantu hamwe.”

Dr Mpunga yavuze ko bahise bashyiraho ingamba zirimo gushyiraho ibigo byita ku banduye muri izo gereza zose, ndetse no koherezayo abaganga bashinzwe gukurikirana abanduye ndetse no gupima abahuye nabo, hari n’izindi ngamba gereza zahise zishyiraho zigamije gukumira ikwirakwira ry’icyorezo.