Minisiteri y’Ubuzima yatangaje ko uyu munsi tariki ya 07 Ugushyingo 2020, abantu 05 basanzwemo COVID-19 mu bipimo 2,859 byafashwe, mu gihe nta n’umwe wayikize mu Rwanda.

Sponsored Ad

Umubare w’abamaze kwandura iki cyorezo mu Rwanda ni 5,213 naho abamaze kugikira bose hamwe ni 4,953.Abakirwaye:225.Abamaze gupfa bose ni : 36.

Abarwayi bashya b’uyu munsi bagaragaye: Kigali:4, Rubavu:1

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Umuyobozi w’Ibiro by’Umukuru w’Igihugu muri Leta Zunze Ubumwe za Amerika, Mark Meadows, yanduye Coronavirus nk’uko abantu bo hafi ye babitangaje.

Ntabwo bizwi neza igihe uyu mugabo yamenyeye ko yanduye iki cyorezo, cyangwa se niba yaragaragazaga ibimenyetso byacyo gusa ikizwi neza ni uko yanduye. Yabimenyesheje abantu ba hafi ye ku wa Kabiri nyuma y’amatora ya Perezida wa Repubulika.

Hari abandi bantu bane bo muri White House nabo banduye iki cyorezo, barimo Nick Trainer, umwe mu bantu bahora iruhande rwa Perezida Trump. Mu minsi ishize nabwo Perezida Trump, umugore we n’umwana wabo muto bose banduye iki cyorezo.

Hari amakuru avuga ko bamwe mu bakozi bo muri White House mu ntangiriro z’iki cyumweru babwiwe ko Meadows yanduye ariko bagasabwa guceceka. Uyu mugabo yari aherutse kugaragara mu ruhame atambaye agapfukamunwa.

Muri Leta Zunze Ubumwe za Amerika hari abantu barenga miliyoni 10 bamaze kwandura iki cyorezo hamwe n’abandi barenga ibihumbi 242 bamaze gupfa.