skol
Kigali
startimes

Covid-19: Umuntu wa 12 yahitanwe na Covid-19 mu Rwanda handura abandi 200

Amakuru   Yanditswe na: Dusingizimana Remy 23 August 2020 Yasuwe: 3133

Kuri iki cyumweru tariki ya 23 Kanama 2020, mu Rwanda hapfuye umuntu wa 12 wahitanywe na Covid-19.Uyu akaba ari umubyeyi w’imyaka 71 y’amavuko.



Habonetse kandi abarwayi bashya 200 ba COVID-19 barimo ab’I Kigali:164 (bapimwe mu masoko ya Kigali), Rusizi:29 (bapimwe mu bibasiwe kurusha abandi), Rubavu:5, Huye:2.Abamaze kwandura iki cyorezo bose mu Rwanda ni 3,089.

Kuri uyu munsi kandi hakize umuntu umwe bituma abamaze gukira bose baba 1,755 naho abakirwaye ni 1,322. Abantu 12 nibo bamaze guhitanwa na COVI-19.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Umuyobozi Mukuru w’Ikigo cy’Igihugu cy’Ubuzima, RBC, Dr Sabin Nsanzimana, yatangaje ko abarwayi 10 ba COVID-19 aribo bashyizwe ku mashini zibongerera umwuka (ventilator) mu kubafasha guhumeka neza.

COVID-19 iterwa n’agakoko ka Coronavirus kangiza bikomeye urwungano rw’ubuhumekero. Utwo dukoko twibasira cyane ibihaha, abafite abasirikare bake mu mubiri bakahazaharira ku buryo badatabawe kare bashobora no gupfa.

Mu kugabanya umubare w’abashobora kwicwa na Coronavirus, hifashishwa imashini zifasha abarwayi guhumeka neza no kubongerera umwuka.

Umuyobozi Mukuru wa RBC mu kiganiro Urubuga rw’Itangazamakuru cyo kuri uyu wa 23 Kanama 2020, yatangaje ko mu bakiri kwa muganga abantu 10 aribo barembye.

Yagize ati “Kuri ubu dufite abarwayi 10 ba COVID-19 bari ku mashini yifashishwa mu kongerera umwuka abarwayi b’indembe (ventilator).’’

Yasobanuye ko bikwiye ko hashyirwa imbaraga mu guhagarika icyorezo ntigikwirakwire. Ni mu gihe muri iyi minsi hakomeje kuboneka ubwiyongere bw’abandura Coronavirus by’umwihariko imibare myinshi yiganje mu Mujyi wa Kigali mu masoko atandukanye.

Dr Nsanzimana avuga ko nka Leta bareba uko icyorezo cyaba gihagaze nko mu mezi abiri ari imbere mu gihe cyakomeza ku muvuduko kiriho kugira ngo hafatwe ingamba.

Ati “Imibare nikomeza kuzamuka gutya mu mezi abiri biraba bimeze bite, impfu ziriyongera, ubukungu buragirwaho ingaruka. Nta muntu n’umwe wakwifuza ko COVID-19 isakara ahantu hose, abakuze tukababura, abantu babyibushye tukababura.’’

Imashini itanga umwuka ku warembejwe na Coronavirus igura hagati y’amadolari ya Amerika ibihumbi 25-50 ni ukuvuga ari hagati ya miliyoni 25 na 50 Frw. Ibihugu bitandukanye byagize ibibazo byo kubona izi mashini kubera umubare munini w’abarwayi.

Kuri ubu u Rwanda rufite imashini 197 zishobora kwifashishwa mu gihe cyo kwita ku ndembe za Coronavirus zikeneye gufashwa guhumeka neza.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Covid-19 yahitanye umuntu wa 50 mu Rwanda abandi 46 barayandura

Minisiteri y’Ubuzima yatangaje ko kuri uyu wa Gatatu tariki ya 02 Ukuboza...
2 December 2020 Yasuwe: 1325 0

Minisiteri ya siporo yatangaje ibisabwa ku bakorera imyitozo muri...

Inama y’Abaminisitiri yabereye muri Village Urugwiro yabaye kuwa Gatanu...
2 December 2020 Yasuwe: 1051 0

Abantu 14 banduye COVID-19 mu Rwanda abandi 28 barayikira

Minisiteri y’Ubuzima yatangaje ko uyu munsi tariki ya 01 Ukuboza 2020...
1 December 2020 Yasuwe: 793 0

Covid-19 yahitanye umugore w’imyaka 40 I Kigali abandi 15 barayandura

Minisiteri y’Ubuzima yatangaje ko uyu munsi tariki ya 30 Ugushyingo...
30 November 2020 Yasuwe: 1053 0

Umugore w’imyaka 25 yahitanwe na Covid-19 mu Rwanda abandi 28...

Minisiteri y’Ubuzima yatangaje ko uyu munsi tariki ya 29 Ugushyingo...
29 November 2020 Yasuwe: 1674 1

Abaganga bahembwa na Leta bemerewe gukorera ahantu harenze hamwe no mu...

Minisiteri y’Ubuzima yatangaje ko yemereye abaganga basanzwe bahembwa na...
29 November 2020 Yasuwe: 1986 0