Minisiteri y’Ubuzima yatangaje ko kuri uyu wa Gatatu tariki ya 02 Ukuboza 2020,i Kigali hapfuye umugabo w’imyaka 45 aba umuntu wa 50 iyi ndwara yishe mu Rwanda.

Sponsored Ad

Uyu munsi kandi hanabonetse abanduye bashya 46 barimo aba Kigali:29,Rwamagana:7, Musanze:4, Rubavu:3,Gakenke:1, Kirehe:1, Nyagatare: 1. Abamaze kwandura bose:5,994.

Abantu 31 nibo bakize kuri uyu wa Gatattu bituma umubare w’abamaze gukira bose uba:5,575. Abakirwaye:369.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Inzego z’Ubuzima mu Bwongereza zemeje urukingo rwa Covid-19 rwakozwe n’ikigo Pfizer gifatanyije na BioNTech ndetse zitangaza ko guhera mu cyumweru gitaha ziratangira gukingira abantu mu buryo bwa rusange.

Mu minsi ishize nibwo Pfizer na BioNTech batangaje ko urukingo rwabo rwizewe ku buryo ndetse rufite ubushobozi bwo gukingira umuntu Covid-19 ku kigero cya 95%.

Nyuma y’iminsi mike ibi bigo bitangaje ibi, u Bwongereza bwabaye igihugu cya mbere cyemeye ko kigiye gutangira gukingira abantu mu buryo rusange.

Kugeza ubu iki gihugu cyari cyamaze kugura mbere y’igihe ingano y’uru rukingo ingana na miliyoni 40, ikazakoreshwa mu gukingira abantu miliyoni 20 haherewe ku bafite ibyago byinshi byo kwandura Covid-19.

Ku ikubitiro u Bwongereza buzahabwa ingano y’uru rukingo ingana na miliyoni 10, miliyoni 30 zizaba zisigaye buzazihabwe nyuma yo kurugeza no mu bindi bihugu.