Gasabo: Umubyeyi w’ abana batandatu amaze icyumweru ararana nabo hanze

11 January 2017. | Ubuzima | 0 Ibitekerezo | Nsanzimana Ernest
  • MyPassion

Umuryango wa Sibomana Japhet wari utuye mu Mudugudu w’Imitari mu Kagari ka Bibare, Umurenge wa Kimironko ugizwe n’abantu barindwi umaze icyumweru urara hanze, nyuma yo gusohorwa mu nzu wari utuyemo.

Ku wa Gatanu w’icyumweru gishize, ni bwo uyu muryango ugizwe n’abantu barindwi barimo abana batandatu na nyina Niyonsenga Espérance, wasohowe muri iyi nzu, ihabwa abandi bana bane babyawe n’umugore wa mbere wa Nyakwigendera Sibomana Japhet.

Abaturage bo muri aka gace yavuze ko Abunzi basohoye uyu muryango mu nzu nyuma y’amakimbirane ashingiye ku mitungo Niyonsenga Espérance yagiranye n’abana bane babyawe n’umugore wa mbere wa Sibomana Japhet no gutsindwa urubanza baburanaga.

Niyonsenga Espérance,avuga ko yababajwe n’uburyo ibyo Abunzi bakoze babikoze mu buriganya abana bose basohorwa mu nzu adahari.

Yagize ati “ Njye nabaga hano; Se w’aba bana yanshatse nyuma y’uko nyina wa bariya bakuru yitabye Imana.Ikintu cyambabaje ni uko bansabye ko nzaha bariya bakobwa inzugi eshatu mu zigize iyi nzu, na bo basabwa ko isambu iri mu Bugesera tuzayigabana, nyuma bajya kuyigurisha noneho bahita baza no gufatira iyi twari dutuyemo.”

Nyuma y’uko umuhesha w’inkiko abasohoye mu nzu Niyonsenga yahise ajya kujurira mu Rukiko rw’Ibanze rwa Gasabo ndetse rutesha agaciro umwanzuro w’urwo rubanza Abunzi bari baciye.

Yagize ati " Urukiko rwahise ruvuga ko nta burenganzira bari bafite rwo guca uru rubanza kuko rwari rurengeje agaciro ka miliyoni eshanu ariko ibyo byose ntibyitaweho."

Biteganyijwe ko Urukiko rw’Ibanze rwa Gasabo ruzasoma uru rubanza ku tariki 26 z’uku kwezi.

Umunyamabanga Nshingwabikorwa w’Umurenge wa Kimironko, Godfrey Karamuzi yavuze ko uyu muryango bagiye kuwushakira ahantu ho kuba by’agateganyo.

Yagize ati “Ariko n’umuhesha w’inkiko yabikoze nabi kuko yari kubanza akareba uko abunzi baciye urwo rubanza aho guhita afata umwanzuro wo kubakura mu nzu kuriya ngo barare ku gasozi; gusa twe ubu tugiye kumushakira ahantu aba atuye ndetse hari n’aho twabonye inzu mu mudugudu w’Imena kuko yajuriye kugira ngo akurikirane iby’urubanza rwe neza.”

Src: igihe

    Facebook Twitter Addthis
Tanga Igitekerezo