Minisiteri y’Ubuzima yatangaje ko kuri uyu wa Mbere tariki ya 08 Kamena 2020 mu Rwanda habonetse abandi barwayi bashya 12 ba COVID-19 bityo abamaze kuboneka mu Rwanda banduye icyo cyorezo bose hamwe baba 451.

Sponsored Ad

Mu bipimo 1,928 byafashwe uyu munsi,byagaragaje ko:

Abanduye bose: 451 (Abashya:12).
Abakize bose: 297 (Abashya:7) Abakirwaye:152.
Abapfuye: 2.

Abarwayi bashya bagaragaye muri Rusizi. Bashyizwe mu kato n’abo bahuye bahise bakurikiranwa.

Abaturarwanda barasabwa gukaza ingamba zo kwirinda icyo cyorezo bakurikiza amabwiriza yo kwambara agapfukamunwa, kubahiriza intera ya metero ndetse no gukaraba kenshi n’amazi meza ndetse n’isabune cyangwa arukoro yabugenewe.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abayobozi ba Kiliziya Gatolika muri Leta Zunze Ubumwe za Amerika na Canada batangiye kwamagana uburyo buri gukoreshwa na zimwe mu nganda ziri gushakisha urukingo rwa coronavirus, aho bifashisha utunyangingo tuvanwe mu nda zakuwemo.

Kiliziya Gatolika n’andi madini atandukanye ya gikiristu ntibemera gukuramo inda mu buryo ubwo ari bwo bwose.

Inganda zitandukanye zo muri Amerika no mu Bushinwa zikomeje ubushakashatsi bwo kuvumbura urukingo rwa coronavirus imaze guhitana abasaga ibihumbi 400 ku isi.

Mu tunyangingo turi kwifashishwa mu gukora zimwe mu nkingo ndetse zinatanga icyizere, harimo utubanza kuvanwa mu nda yakuwemo (urusoro).

Ikinyamakuru Science Magazine cyatangaje ko nk’urukingo ruri gukorwa n’ikigo CanSino Biologics, Inc i Beijing hifashishwamo utunyangingo dutanga impyiko twitwa HEK-293 tuboneka mu nda ikiri urusoro.

Utwu tunyangingo ni natwo turi kwifashishwa na Kaminuza ya Oxford mu gukora urukingo rwa coronavirus, turi kwifashishwa kandi mu rukingo rukorwa na Kaminuza ya Pittsburgh ndetse n’urukorwa n’ikigo ImmunityBio.

Bamwe mu bihayimana muri Amerika na Canada bahise bamagana izo nkingo kuko zikorwa habanje gupfa abandi bantu.

Inama nkuru y’abepiskopi Gatolika muri Amerika n’indi miryango 20 ya gikiristu yandikiye ubuyobozi bw’ikigo gishinzwe imiti n’ibiribwa muri Amerika, bamagana izo nkingo.

Bagize bati “Ni iby’ingenzi rwose ko Abanyamerika babona urukingo rwakozwe hakurikijwe amahame nyayo ariko nta munyamerika wagahatiwe guhitamo gukingirwa nyamara ngo ahonyore imyemerere ye.”

Basabye ko hashakishwa ubundi buryo bwakoreshwa hakaboneka izindi nkingo bitabaye ngombwa ko hakoreshwa utunyangingo twavuye mu nsoro zabanje gukurwa mu nda.

Umuryango Mpuzamahanga wita ku Buzima, OMS iherutse gutangaza ko hari inkingo zisaga 130 ziri gukorwa hirya no hino, icumi muri zo zigeze mu gihe cyo gukorerwa igeragezwa. Eshanu muri izo zikoresha utunyangingo twa HEK-293.