Ikigo nderabuzima cya Gatsata, ubu ntikiri kwakira abarwayi bakigana bose nk’uko byari bisanzwe, ahubwo, cyahinduriwe kuba ikigo cyita ku barwayi ba Covid-19 gusa.

Sponsored Ad

N’ubwo mu itangazo ryasohotse ku Itariki 17/07/2020 umuyobozi w’iki kigo nderabuzima Umuhoza Nicole, yamenyeshaka abari basanzwe bagana iki kigo ko batakiri kwakira abakigana, ahubwo abakeneye ubufasha bajya kubindi bigo nderabuzima bibegereye, ariko ntagaragaze impamvu yabyo, yabwiye ikinyamakuru Ubumwe dukesha iyi nkuru ko ubu bari kwita ku barwayi ba Covid-19 gusa.

Mu magambo ye yagize ati: Ubu guhera ejo kucyumweru turi kwakira abarwayi ba Covid-19, kandi biragenda neza ntakibazo. Abandi barwayi bose ntan’umwe twemerewe kwakira, bagana ibindi bigo nderabuzima.”

Umuhoza yanavuze ko nta murwayi wijyana aha kuri iki kigo kuko bo badasuzuma Covid-19, ahubwo bavura abayirwaye.

Yakomeje agira ati: “Umurwayi uza hano ni uko aba afite urundi rwego rumuzanye, mbese aba arwaye Covid-19, kuko ntabwo twebwe dusuzuma. Ni ukuvuga ko nta murwayi waba yiyumvaho ibimenyetso ngo aze ari twebwe agana ngo tumusuzume.”

Nzaramba Jean de Dieu (Ayo si amazina ye nyakuri), umwe mu bakozi kuri iki kigo yagize ati: « Ubu guhera ku cyumweru ikigo cyacu cyabaye centre yo kwakira abarwayi ba Covid-19. Kuwa Gatandatu twiriwe I Kanyinya mu mahugurwa y’ukuntu tugiye kuzajya twakira abarwayi ba Covid-19. Ubu tumeze neza ntakibazo.”