Kigali

Kirehe: Litiro 10,000 z’inzoga z’inkorano n’ibiro 1,250 by’urumogi by’agaciro ka miliyoni 25Rwf byatwitswe

Amakuru   Yanditswe na: Iyamuremye Janvier 26 January 2018 Yasuwe: 252

Ubukangurambaga bwo kwirinda, gukumira no kurwanya ibiyobyabwenge, kuwa kane tariki ya 25 Mutarama bwakomereje mu karere ka Kirehe, aho abayobozi mu nzego za Leta barimo Minisitiri w’Ubutegetsi bw’Igihugu Francis Kaboneka, uw’Urubyiruko, Rosemary Mbabazi, abayobozi b’Ingabo na Polisi bakanguriye ibyiciro bitandukanye by’abaturage kwirinda ibiyobyabwenge bigaragara cyane cyane mu rubyiruko.

Ni igikorwa cyabereye mu kagari ka Rwantonde umurenge wa Gatore mu karere ka Kirehe Intara y’Iburasirazuba.

Mbere y’uko abayobozi bageza ijambo ku baturage bari aho, habanje kumvwa ubuhamya bwatanzwe n’uwitwa Musabyemungu Vedaste wari warabaye imbata y’ibiyobyabwenge ubu akaba yarabivuyemo, na SibomanaVincent wari umucuruzi wabyo nawe ubu akaba yarabiretse.

Mu buhamya bwe, Musabyemungu yavuze ko yatangiye abinywa gake yigana bagenzi be, bigera ubwo bimubata, nyuma aza kubireka akaba yicuza igihe yataye.

Yavuze ati:“Narwanye urugamba rukomeye kugira ngo mbivemo kuko udutsiko tw’abanywa urumogi turi hanze aha iyo babonye ubivuyemo bakomeza kukugendaho bagushuka ngo ubisubiremo.”

Yakomeje avuga ati:’Urubyiruko mukwiye kwitonda ntimugwe mu mutego wabo, kuko urumogi rwica ubuzima, rukagutera kwiba ndetse ugahorana umwanda kandi ibi byose mbabwira byambayeho.”

Yavuze ko kugirango abivemo yafashwe akajyanwa mu kigo ngororamuco, yiga imyuga itandukanye, aho aviriyeyo atangira kwikorera, ubu akaba afite akazi kamwinjiriza amafaranga.

Ibiyobyabwenge bwangijwe

Sibomana we yavuze ko yacuruje urumogi igihe kitari gito ageza ubwo atangira kugurisha amasambu n’imitungo ye kubera guta umutwe.

Avuga ko yaje gufungwa akava muri gereza yaragororotse none ubu akaba amaze gutera imbere.

Yavuze ati:“Niberaga mu rumogi nducuruza ndukuye Tanzaniya, nza kurufatanwa ndafungwa, aho mfunguriwe abo tungana nasanze baraguze imodoka, baba mu nzu nziza, mu gihe jye nta kintu nari nsigaranye.”

Mu ijambo Minisitiri Kaboneka yabwiye abari aho, yavuze ko “umwanzi w’ibanze w’urubyiruko uyu munsi ari ibiyobyabwenge.”

Yakomeje avuga ati:”Kugira icyo ugeraho no kwiteza imbere bisaba umuntu ufite ubuzima bwiza kandi utekereza neza, umutungo w’u Rwanda ni abaturage cyane cyane urubyiruko ariko igiteye impungenge ni uko ubuzima bwabo bwugarijwe n’ibiyobyabwenge.”

Yakomeje avuga ko ibiyobyabwenge ari kimwe mu by’ingenzi bidindiza iterambere ry’igihugu kuko ntawateza igihugu imbere yarabaye imbata y’ibiyobyabwenge, dore ko ubinywa aba atakijya mu ishuri abandi bagatabwaho amafaranga menshi igihe bari mu bigo ngororamuco bifasha ababaswe n’ibiyobyabwenge.

Kuri iyi ngingo yavuze ati:”Turabasaba kureka ibiyobyabwenge kuko dushaka urubyiruko rufite ubuzima bwiza kandi bufite icyerekezo, ikaba ari nayo mpamvu tuba twaje mu bukangurambaga nk’ubu.”

Minisitiri Kaboneka yasoje avuga ati:”Kirehe mufite amateka meza ariko kugirango akomeze ni uko mubikorera muharanira kurwanya ikibi. Ntabwo twakwemera ko Kirehe iba icyambu kinyuzwamo ibintu biza gusenya igihugu cyacu. Murasabwa gutanga amakuru kubakwirakwiza ibiyobyabwenge.”

Minisitiri Mbabazi nawe yasabye urubyiruko kurangwa no gufata ibyemezo binoze kandi bibateza imbere, abasaba gukorana na Polisi kugirango abanywa n’abacuruza ibiyobyabwenge bafatwe.

Yavuze ati: “Ntitwagera ku mutekano n’iterambere birambye mu gihe urubyiruko rwacu rurimo kwangirikira kubera ibiyobyabwenge, niyo mpamvu kubirwanya bigomba kuba inshingano ya buri wese.”

Yashimye inzego z’umutekano zidahwema kubirwanya aho yagize ati:” Abishora mu bucuruzi bw’ibiyobyabwenge ntibashobora kwihanganirwa kuko byangiza abanyarwanda cyane urubyiruko, tukaba dushimira Polisi y’u Rwanda n’izindi nzego z’umutekano zidahwema gufata ababyishoramo.”

Umuvugizi wa Polisi y’u Rwanda Commissioner of Police (CP) Theos Badege, yavuze ko ibiyobyabwenge bigira ingaruka ku buzima bw’ubikoresha, asaba abatuye akarere ka Kirehe kimwe n’ahandi mu gihugu kwirinda kunywa no gucuruza ibiyobyabwenge kuko bihanwa n’amategeko, kandi ko Polisi yashyizeho ingamba zikomeye zo kubikumira no gufata ababyishoramo.

Yavuze ati:”Abantu bakwiye kumenya ko gukoresha, gucuruza no gukwirakwiza ibiyobyabwenge ari icyaha gihanwa n’amategeko, uretse ko binagira ingaruka mbi ku buzima bw’abantu. Ababyishoramo bamenye ko Polisi y’u Rwanda itazahwema gukaza ingamba zo kubirwanya.

CP Badege yasoje asaba abaturage gukaza amarondo no gutanga amakuru y’ahaturuka ibiyobyabwenge kugirango bicike mu gihugu.

Muri iki gikorwa cy’ubukangurambaga bwo kwirinda ibiyobyabwenge, hanangijwe litiro zirenga 1000 z’inzoga z’inkorano zitemewe mu Rwanda na toni 1 y’urumogi, byose byafashwe mu gihe cy’amezi 6 ashize.

Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Dr Murugu yafunguye amarembo mu Rwanda, arasaba kumwizera ubundi amibe...

Dr Peter Murugu ukomoka muri Kenya ni umuvuzi ukoresha ibimera, akavura...
2 March 2019 Yasuwe: 2209 1

Mu gahinda kenshi Dr Byamungu wakoraga muri BRD n’abana be 4 bapfiriye mu...

Dr Byamungu wari Umuyobozi ushinzwe ishoramari muri Banki y’Igihugu...
12 January 2019 Yasuwe: 11855 2

Imodoka yavaga mu mugi yerekeza Nyabugogo yataye umuhanda igonga abantu 7...

Polisi y’ u Rwanda ishami rishinzwe wo mu muhanda yavuze ko imodoka yo mu...
11 January 2019 Yasuwe: 5192 1

Umunyamideli w’umunyarwandakazi witeguraga gukora ubukwe vuba yapfuye...

Umunyamideli wari warabigize umwuga Alexia Uwera Mupende yitabye Imana ku...
9 January 2019 Yasuwe: 5057 0

Mukangendahayo Joselyne arwaye uburwayi budasanzwe butuma aruka ibikeri,...

Mukangendahayo Joselyne, umukobwa utuye mu mudugudu wa Rusasa mu kagari ka...
31 December 2018 Yasuwe: 5333 0

Uyu mubyeyi arashinja abaganga bo mu bitaro bya Muhima kumurangarana...

Ibitaro bya Muhima mu Mujyi wa Kigali birimo gukurikirana ikibazo cy’umugore...
26 December 2018 Yasuwe: 3120 1