Kigali

Nyaruguru: Kwishyira hamwe mu makoperative biri mu byatumye bahashya bwaki

Amakuru   Yanditswe na: Nsanzimana Ernest 15 May 2017 Yasuwe: 399

Bamwe mu batuye umurenge wa Kibeho w’ Akarere ka Nyaruguru bagaragaza ko kwishyirahamwe mu makoperative byabafashije kwikura mu bukene bwari bubugarije bituma bigobotora ikibazo cy’ imirire mibi na bwaki byari byugarije abana babo. By’ umwihariko bagaragaza ko byatumye bwaki igabanyuka ku kigero cya 93%.

Aba baturage bibumbiye muri koperative ‘duharanire imirire myiza’ bavuga ko mbere y’uko bibumbira muri iyo koperative bari babayeho mu bukene.

Iyo koperative yashinzwe mu mwaka w’ 2011, igizwe n’ abanyamuryango bagera kuri 20. Ubwo iyo koperative yashingwaga mu mwaka w’ 2011 mu karere ka Nyaruguru hari abana 2332 barwaye bwaki.

Uretse icyo kandi ngo mu muri ako karere abana bagera kuri 45,6% bari bafite ikibazo cyo kugwingira.

Umwe mu babyeyi bibumbuye muri koperative duharanire imirire myiza witwa Mukandutiye Placidie yavuze ko mbere y’ uko agera kuri iyo koperative umwana we w’ imyaka itandatu yari arwaye bwaki. Ngo aho agereye muri iyo koperative yabashije kwiteza imbere no kwita ku mwana we ubu umwana we ameze neza.

Yagize ati “Byagaragaye ko umwana wanjye wari ufite imyaka 6 yari afite ikibazo cy’ imirire mibi, umusatsi waracuramye, amaso yarahengeye, ngeze muri iyi koperative nabohaga imipira, n’ utundi dukoresho nkabasha kugurira umwana ifu y’ igikoma, n’ amata. Ubu umwana yarakize nta kibazo agifite”

Mukandutiye avuga ko mbere y’ uko agera muri iyo koperative yashoboraga kumara ukwezi atarinjiza n’ amafaranga 1000 ariko ngo kuri ubu yinjira nibura ibihumbi 30 buri kwezi.

Umuyobozi w’ iyo koperative Mukabutera Beatrice avuga ko bashinze iyo koperative nta kintu bafite baheraho, bagatangira baboha imipira y’ imbeho bakoresheje uduti, n’ amakorosi, kuri ubu bafite imishini eshanu ziboha imipira n’ izindi mashini zidoda (ibyarahani).

Mukabutera avuga ko afite abakozi bamuhingira akabishyura, ngo iyo agereranyije abona ku kwezi yakwigenera nk’ umushahara w’ ibihumbi 70.

Iyi koperative ifite agaciro ka miliyoni n’ ibihumbi 300 y’ amafaranga y’ u Rwanda, ukeneye kuyinjiramo bimusaba gutanga umugabane shingiro ungana n’ ibihumbi 10.

Buri mwaka buri umwe mu banyamuryango b’ iyi koperative, agenerwa amafaranga yo kwishyurira ubwisungane mu kwivuza abantu bane bo mu muryango we.

Mu karere kose ka Nyaruguru hari amakoperative 4 akora nk’ iyi yitwa “Duharanire imirire myiza”

Karemera Anastase ushinzwe ubuzima mu karere ka Nyaruguru avuga ko aya makoperative ari kimwe mu byafashije akarere kurwanya bwaki n’ imirire mibi mu bana.

Yagize ati “Mbere y’ uko dutangira iyi gahunda yo kurwanya imirire mibi mu bana twari dufite abana 2332 barwaye bwaki, abana 45,6% bari bafite ikibazo cyo kugwingira. Ubu dufite abana 147 bari mu muhondo ni ukuvuga ko bafite ikibazo cy’ imirire mibi kidakabije(bwaki yagabanyutse ku kigero cya 93%). Abana bagwingira nabo ubu 41%”

Karemera avuga ko mbere y’ uko batangira gahunda yihariye yo kurwanya imirire mibi bafataga abana bakabitaho babasubiza mu miryango bakongera bakazahazwa n’ ikibazo cy’ imirire mibi. Avuga ko gushishikariza ababyeyi kuboneza urubyaro, gutanga ifu y’ igikoma no koroza abaturage amatungo magufi arenga ibihumbi 11 biri mu byatumye umubare w’ abana barwaye bwaki n’ abagwingira ugabanyuka.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Bwa mbere Kigali igiye kwakira inama nini izitabirwa n’ abantu 10...

Mu mpera z’ umwaka utaha I Kigali mu Rwanda hazabera inama nini ivuga kuri...
24 March 2018 Yasuwe: 2631 0

Msgr Bimenyimana Jean Damascène wayoboraga Diyosezi ya Cyangugu yaguye...

Kuri iki cyumweru nibwo hamenyekanye inkuru y’urupfu rwa Musenyeli...
11 March 2018 Yasuwe: 1593 1

Nyaruguru: Nyakwigendera Karamba biravugwa ko yazize inzara, abandi...

Abarokotse jenoside yakorewe abatutsi batishoboye batujwe mu mudugudu...
11 March 2018 Yasuwe: 7265 6

Niba uryamana terefone ngendannwa hafi yawe urashyira ubuzima bwawe mu...

Abantu batandukanye bakunze gushyira terefone ngendanwa zabo hafi y’uburiri...
27 February 2018 Yasuwe: 2316 1

Nyagatare: Polisi yataye muri yombi batatu binjizaga inzoga zitemewe mu...

Mu gitondo cyo kuri uyu wa mbere tariki ya 26 Gashyantare 2018, Polisi y’u...
26 February 2018 Yasuwe: 230 0

Karongi: Impunzi z’Abanyekongo zaguye mu myigaragambyo bashyinguwe

Ku wa Gatandatu tariki ya 24 Gashyantare, 2018 ni bwo hashyinguwe imirambo...
25 February 2018 Yasuwe: 3355 1