addresiya
Kigali
startimes

Rusizi: Impanuka y’ikamyo yahitanye ubuzima bw’umuntu

Amakuru   Yanditswe na: Martin Munezero 27 April 2020 Yasuwe: 2836

Ku Cyumweru tariki ya 26 Mata mu masaa kumi y’umugoroba, mu mudugudu wa Gahurubuka, akagari ka Giheke mu murenge wa Giheke mu karere ka Rusizi ku muhanda munini wa Rusizi-Huye, habereye impanuka y’ikamyo ihitana umushoferi wari uyitwaye.



Umunyamabanga Nshingwabikorwa w’Akagari ka Giheke, Ngiruwonsanga Joseph, wabitangarije Bwiza dukesha iyi nkuru, ngo iyi kamyo yari itwawe n’umushoferi w’Umunyakenya witwa Thomas Mwakisha Mwarango w’imyaka 43 y’amavuko, wakoreraga sosiyete yitwa One to One yo muri icyo gihugu.

Iyo kamyo ikaba yari itwaye amavuta yo guteka iyakuye mu gihugu cya kenya iyajyanye ku bigega bya MAGERWA mu mujyi wa Rusizi.

Yageze mu ikorosi itangiye kuzamuka agace kegereye uruganda rw’icyayi rwa Shagasha ananirwa kurikata, imodoka ihita ibirinduka, icy’inyuma gitandukana n’icy’imbere. Gitifu Ngiruwonsanga Joseph yagize ati:

Muri uko gutandukana kw’igice cy’imbere n’icy’inyuma no kuba yari yikoreye cyane, byombi byahise bigwa mu muferege iruhande rw’umuhanda, umushoferi afatwa mu byuma by’igice cy’imbere biramushwanyaguza ku buryo byasabye ko abatekinisiye b’uruganda rw’icyayi rwa Shagasha bazana imashini bagacagagura ibyo byuma bakabona gukuramo umurambo wari wangiritse cyane.

Uyu muyobozi yavuze ko atari ubwa mbere aka gace kabereyemo impanuka, kuko ngo no mu mpera z’umwaka ushize indi kamyo yavaga i Kigali yerekeza i Rusizi yikoreye, yamanutse igice cyerekeza kuri urwo ruganda rw’icyayi rwa Shagasha, na yo irabirinduka ihitana umwe mu bari bayirimo, shoferi arakomereka bikabije.

Yavuze ko zihagwa nta zindi ziba zibisikana na zo, avuga ko ababishinzwe bakwiye kureba ikibazo gihari, cyaba ari icy’ibyapa bike bikaba byakongerwa ariko abantu ntibakomeze kuhatakariza ubuzima.

Umuvugizi wa Polisi y’Igihugu mu Ntara y’Uburengerazuba, CIP Karekezi Bonaventure, yemeje aya makuru avuga ko byatewe n’uko umushoferi yananiwe gukata iryo korosi rihari, ikamyo ikagwa ikanamuhitana kandi ko yari ayirimo wenyine.

Yavuze kandi ko atahamya ko byatewe no kunanirwa, kuko hari ahashyizweho kugirango abashoferi babanze guhagarara baruhuke bakirenga ishyamba rya Nyungwe, ngo bishoboka ko yabitewe n’uburangare ntiyite ku byapa biri muri ako gace, anabifatanije no kutamenya neza uyu muhanda. Mu butumwa yahaye abashoferi nyuma y’iyi mpanuka, yagize ati:

Turasaba abashoferi ko igihe cyose batwaye imodoka bagomba kubahiriza amategeko, bagasoma n’ibyapa byo ku mihanda cyane ko ari byo biba bibaburira by’umwihariko ku batazi imiterere y’imihanda bagezeho, kuko iyo utitaye ku gusoma ibyo byapa ushobora no kuhahurira n’akaga karimo no kuhaburira ubuzima nk’uko uriya bimugendekeye.

Umurambo wa nyakwigendera wahise ujyanwa mu buruhukiro bw’ibitaro bya Gihundwe mbere y’uko hafatwa icyemezo cy’uburyo uzashyingurwamo.

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?
    Log in

    Amategeko n'amabwiriza birkurikizwa


  • chat_bubble

    Ariko se buriya iyo mufata inkuru mugashishura(copy-paste) nta no guhinduramo na kantu na kamwe koko buriya muba mwumva aribyo

    1 month ago

Inzindi nkuru

Hamazwe impungenge ku bibazaga kuba hagiye gufungurwa ingendo hagati...

Umuyobozi w’ikigo cy’igihugu cy’ubuzima Dr. Nsanzimana Sabin yatangaje ko u...
30 May 2020 Yasuwe: 4202 0

Covid-19: Abantu 6 banduye Coronavirus mu Rwanda hakira 2 kuri uyu wa...

Minisiteri y’Ubuzima mu Rwanda yatangaje ko Kuri uyu wa Gatanu tariki 29...
29 May 2020 Yasuwe: 515 0

COVID-19 Habonetse abantu 3 bashya banduye Coronavirus mu Rwanda nta wakize...

Minisiteri y’Ubuzima mu Rwanda yatangaje ko Kuri uyu wa Kane tariki 28...
28 May 2020 Yasuwe: 461 0

RURA yahaye abamotari amabwiriza mashya bagomba gukurikiza mu kurwanya...

Urwego Ngenzuramikorere mu Rwanda, RURA, rwahaye amabwiriza mashya abatwara...
28 May 2020 Yasuwe: 1732 0

Covid-19: Habonetse abantu 7 bashya banduye Coronavirus mu Rwanda hakira...

Minisiteri y’Ubuzima mu Rwanda yatangaje ko Kuri uyu wa Gatatu tariki 27...
27 May 2020 Yasuwe: 601 0

Polisi y’u Rwanda yatangaje impamvu 4 zatumye ifunga igitaramo cyo kuri You...

Umuvugizi wa Polisi y’u Rwanda,CP John Bosco Kabera,yatangaje ko yafunze...
27 May 2020 Yasuwe: 942 0