Kuri uyu Kane tariki ya 10 Nzeri 2020, Minisiteri y’Ubuzima yatangaje ko I Kigali hapfuye umubyeyi w’imyaka 62 wabaye uwa 22 Covid-19 yishe mu Rwanda.

Sponsored Ad

MINISANTE yatangaje kandi ko mu bipimo 2,838 byafashwe uyu munsi,habonetse abarwayi bashya 19 barimo ab’IKigali:16 (bapimwe mu bibasiwe kurusha abandi),Gisagara:2, Rubavu:1. Abanduye bose bamaze kuba 4,479.

Uyu munsi kandi hakize abantu bashya 27 bituma umubare w’abamaze gukira iki cyorezo bose uba 2,352, abakirwaye ni 2,105.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Ku Isi ubu harabarurwa abantu 908293 bamaze kwicwa na Coronavirus, barimo 21 bo mu Rwanda mu gihe muri rusange abamaze kwandura iki cyorezo bo ari miliyoni 28.

Leta Zunze Ubumwe za Amerika nicyo gihugu kimaze gupfusha abantu benshi kuko ari 195239, mu gihe u Buhinde bukomeje kwibasirwa cyane kuko mu masaha 24 ashize, bwagize abantu 7201 banduye na 28 bapfuye bituma umubare w’impfu bumaze kugira uzamuka ugera ku 75119.

Brésil nayo ikomeje kugira impfu nyinshi kuko ubu zimaze kuba 128653 mu gihe Mexique yo ifite impfu 69095. Mu masaha 24, mu Burusiya hapfuye abantu 128 naho umubare rusange w’abo iki cyorezo kimaze guhitana muri iki gihugu akaba ari 18263.

Uko imigabane irutanwa mu kugira impfu nyinshi mu mibare yatangajwe mu gitondo:

1.U Burayi: 211330
2.Amerika ya Ruguru: 284506
3.Aziya : 157339
4.Amerika y’Epfo: 222322
5.Afurika: 31962
6.Océanie: 819