skol
fortebet

Umugabo w’imyaka 39 yabaye umuntu wa 34 wahitanwe na Covid-19 mu Rwanda mu gihe abandi 12 banduye

Yanditswe: Friday 16, Oct 2020

Sponsored Ad

Minisiteri y’Ubuzima yatangaje ko kuri uyu wa Gatanu tariki ya 16 Ukwakira 2020,Covid-19 yahitanye umugabo w’imyaka 39, aba umuntu wa 34 uhitanwe n’iki cyorezo mu Rwanda.

Sponsored Ad

Minisante yatangaje ko abantu 12 aribo banduye Covid-19 mu gihe abandi 63 bakize,mu bipimo 3,450 byafashwe.Abarwayi bashya bagaragaye I Kigali:3, Karongi:9 (abapimwe mu nkambi y’impunzi).

Umubare w’abantu bamaze kwandura iki cyorezo cya Covid-19 mu Rwanda wabaye 4,965 mu gihe abamaze gukira bose hamwe ari 4,664. Abakirwaye ni 267.Abamaze guhitanwa n’iki cyorezo ni 33.

Abanyarwanda barasabwa kutirara ngo bumve ko icyorezo cyarangiye.Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa n’amazuru buri gihe bavuye mu ngo, bakaraba intoki kenshi no kwirinda amakoraniro n’ibindi bintu byose bishobora guhuriza hamwe abantu benshi.

Umuntu ugaragaje ibimenyetso bya Coronavirus birimo inkorora, guhumeka nabi, gucika intege n’ibindi, agirwa inama yo guhamagara umurongo utishyurwa wa 114 kugira ngo ahabwe ubufasha n’abaganga.

Ishami ry’Umuryango w’Abibumbye rishinzwe kwita ku Buzima, OMS, ryaburiye ibihugu bya Afurika ko byahura n’ingorane zikomeye bitabasha kwirengera by’umwihariko mu bijyanye n’ubukungu mu gihe icyorezo cya Covid-19 cyakongera kubura umutwe kuri uyu mugabane.

Ibi OMS ibitangaje nyuma y’uko hakomeje kugenda hagaragara ubwandu bushya mu bihugu byagiye byoroshya ingamba zo kwirinda iki cyorezo. Ibi nibyo iheraho ivuga ko muri Afurika iki cyorezo gishobora kurenga igaruriro mu gihe ibihugu byaba bikomeje gufungura ibikorwa bitandukanye ubutitsa.

Nubwo uyu muryango usaba ibihugu bya Afurika kwigengesera igihe bikomorera ibikorwa bimwe na bimwe, unavuga ko uyu mugabane udakwiye kongera gushyiraho ibihe bya Guma mu rugo kuko nabyo byawushegesha.

Umuyobozi wa OMS muri Afurika, Matshidiso Moeti, yizeza ko hari uburyo bwashyizweho kugira ngo ibihugu bitandukanye byo kuri uyu mugabane bizabashe kubona urukingo mu buryo bworoshye.

Kugeza ubu ku mugabane wa Afurika harabarirwa abantu miliyoni 1.6 banduye Covid-19 ndetse n’abasaga ibihumbi 39 bishwe nayo.

Nubwo Afurika itakozweho cyane n’icyorezo cya Covid-19 mu bijyanye n’umubare w’abayandura ndetse n’abo ihitana, impuguke zivuga ko ingaruka z’iki cyorezo kuri uyu mugabane zigaragarira cyane mu bijyane n’ubukungu.

Banki y’Isi yakoze ikigereranyo yerekana ko ubukungu bwa Afurika buzasubira inyuma mu buryo bukomeye ku nshuro ya mbere mu myaka 25 biturutse kuri Coronavirus.

Imibare ya Banki y’Isi yo ku wa 9 Mata igaragaza ko ubukungu bwo muri Afurika yo munsi y’Ubutayu bwa Sahara, bwagizweho ingaruka zikomeye na Coronavirus ndetse ko buzamanuka ku kigero cya -2.1% na -5.1% buvuye kuri 2.4% bwariho mu 2019.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa