Umugabo w’imyaka 31 yabaye umuntu wa 18 wahitanywe na COVID-19 mu Rwanda nkuko Minisiteri y’Ubuzima yabitangaje kuri uyu wa Kane tariki ya 03 Nzeri 2020.

Sponsored Ad

Iyi Minisiteri yanatangaje ko mu bipimo 5,079 byafashwe uyu munsi habonetsemo abantu 37 bashya banduye iki cyorezo gikomeje koreka isi yose.Abanduye barimo ab’I Kigali:23 (abahuye n’abanduye mu masoko), Rusizi:4, Gisagara:3, Gakenke:2,Nyabihu:1, Kamonyi:1, Nyanza:1, Musanze:1, Rubavu:1.

Kuva Covid-19 yagera mu Rwanda kuwa 14 Werurwe 2020,abamaze kuyandura bose ni 4,255.

Uyu munsi kandi hakize abantu bashya 92 bituma umubare w’abamaze gukira iki cyorezo bose uba 2163, abakirwaye ni 2,074.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Ikigo gishinzwe kurwanya no gukumira indwara muri Leta zunze Ubumwe za Amerika, (CDC), cyasabye leta 50 zigize iki gihugu gutegura uko urukingo rwa Coronavirus rwazakwirakwizwa mu bari mu byago kuruta abandi, bitarenze Ugushyingo 2020.

Inyandiko zagiye ahagaragara kuri uyu wa Gatatu zigaragaza iyi gahunda, zafashwe nk’izifite igisobanuro gikomeye mu bya politiki, kuko Perezida Donald Trump yitegura kongera kwiyamamaza mu matora ya Perezida wa Amerika, ndetse yashoye amafaranga menshi mu gukora urukingo rwa COVID-19, imaze guhitana Abanyamerika basaga 180,000.

Inyandiko zigaragaza ko CDC irimo kwitegura ko mu minsi ya vuba hazaboneka urukingo rumwe cyangwa ebyiri za COVID-19, zikaboneka mu ngano iringaniye bitarenze Ukwakira.

Byitezwe ko izi nkingo zahita zitangwa ku buntu ku matsinda afite ibyago byinshi byo kwandura Coronavirus nk’abakora mu nzego z’ubuvuzi, iz’umutekano, inzu zivurirwamo abarwayi ndetse no ku bayobozi muri izo nzego.

Inzego zitandukanye zakomeje kuvuga ko kwihutisha ibikorwa byo kurukora bitazabangamira ubwizerwe bw’urukingo, kuko ari nako rugenda rugeragezwa.

Ibigo bikora imiti nka Moderna Inc (MRNA.O), AstraZeneca Plc (AZN.L) na Pfizer Inc (PFE.N) bikomeje kuyobora urugendo rwa gushaka urukingo rwizewe rw’iki cyorezo gikomeje kwibasira Isi.

Nk’uko Reuters yabitangaje, Umuyobozi wa CDC, Robert Redfield yasabye ba Guverineri ba leta 50 zigize iki gihugu kwihutisha kubaka ibigo bizaba bikwirakwiza urukingo, no gukuraho imbogamizi zose zabuza umushinga kuba ugezweho bitarenze iya 1 Ugushyingo.

Nubwo nta rukingo rwa coronavirus ruremezwa n’Ishami ry’Umuryango w’Abibumbye ryita ku Buzima, OMS, ibihugu nk’u Burusiya na Madagascar byatangaje ko byarubonye.

Leta zunze Ubumwe za Amerika, na zo zifite inkingo zamaze kwemeza ko zigiye gukoresha nubwo zitaremezwa na OMS. CDC ivuga ko mu nkingo zitandukanye ziri gukorwa hirya no hino, yahisemo ebyiri za sosiyete Pfizer na Moderna.