Minisiteri y’Ubuzima yatangaje ko uyu munsi tariki ya 11 Ukuboza 2020,umugabo w’imyaka 71 wo mu Mujyi wa Kigali, yishwe na COVID-19 bituma umubare w’abamaze guhitanwa n’iki cyorezo mu Rwanda uba 54.

Sponsored Ad

Uyu munsi kandi,abantu 79 basanzwemo ubwandu bwa COVID-19 mu bipimo 3,642 byafashwe, mu gihe abandi 37 bayikize mu masaha 24 yashize.Abanduye basanzwe I Kigali: 31, Musanze: 27, Burera: 12, Rubavu: 9.

Kuva ku wa 14 Werurwe 2020 ubwo umurwayi wa mbere yabonekaga mu Rwanda hamaze gufatwa ibipimo bya Coronavirus 661 637, byasanzwemo 6428 banduye.

Abantu 5,826 bamaze gukira covid-19 ndetse barasezerewe nyuma yo gupimwa bagasangwa nta bwandu bagifite mu mibiri yabo mu gihe 548 bakiri kwitabwaho.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Itsinda ry’abahanga mu nzego z’ubuzima muri Leta Zunze Ubumwe za Amerika bemeje urukingo rwa COVID-19 rwakozwe na Pfizer-BioNTech, nk’urudashobora kugira ingaruka na zimwe rutera umuntu uruhawe.

Itsinda ry’abahanga mu buzima rigizwe n’abantu 23 niryo ryemeje uru rukingo nyuma yo kugenzura niba nta ngaruka rushobora gutera ku buzima bwa muntu. Uru rukingo rwamaze kwemezwa mu bihugu birimo u Bwongereza, Canada, Bahrain na Arabie Saoudite.

Nubwo iri tsinda ryarwemeje, bizasaba ko ikigo gishinzwe imiti muri Amerika, FDA, aricyo cyanzura ko rwizewe ku buryo rutangira guhabwa abantu. Ni igikorwa gitegerejwe mu minsi mike iri imbere cyane ko Amerika ikomeje kwibasirwa cyane na COVID-19.

Kwemeza uru rukingo bikozwe n’iryo tsinda ry’abahanga bije nyuma y’uko mu masaha 24 ashize, muri Amerika abantu barenga 3000 bahitanywe na COVID-19, akaba ariwo mubare munini wagaragaye ku Isi yose.