Umuyobozi Mukuru wa Polisi y’u Rwanda, IGP Dan Munyuza araburira ko abatekereza guhungabanya umutekano bibeshya, ahubwo ko baza bagafatanya n’abandi gukomeza kuwubungabunga.

Sponsored Ad

Mu kiganiro polisi yagiranye n’abanyamakuru ku wa Gatanu tariki ya 16 Ugushyingo 2018, yagarutse ku bagerageje guhungabanya uyu mutekano mu karere ka Nyaruguru hagati muri uyu mwaka abagenera ubutumwa.

IGP Dan Munyuza yagize ati “Haracyariho abarota ko bazahungabanya umutekano w’u Rwanda, ariko izo ni inzozi nyine, ntibazigera bazikabya, kuko tuwukomeyeho”.

Uyu muyobozi yavuze ko usanga igisa n’intambara yabo bayirwanira ku mbuga nkoranyambaga, ku buryo udafite amakuru yakeka ko ibintu byacitse.

Muri rusange ngo abafite ibyo byifuzo usanga ari urusaku gusa, n’ibindi wakwita ko ari inzozi.

Muri iki kiganiro, abanyamakuru basabwe by’umwihariko gukomeza ubufatanye na Polisi mu rwego rwo gukomeza kurwanya ibyaha bitandukanye birimo ibyugarije urubyiruko cyane nk’ikoreshwa ry’ibiyobyabwenge, gusambanya abana n’ibindi.

Iki ni cyo kiganiro cya mbere, IGP Munyuza agiranye n’itangazamakuru kuva yagirwa Umuyobozi Mukuru wa Polisi y’ u Rwanda mu Ukwakira uyu mwaka wa 2018.