Ku mugoroba wo kuri Uyu wa Gatatu tariki ya 02 Nzeri 2020,mu masaha ya 18:30, abantu babarirwa muri 20 bafatiwe mu kabari kazwi nk’Umunara Bar kari mu Murenge wa Gisozi mu Kagari ka Ruhango, muri Gasabo.

Sponsored Ad

Mu gihe inama y’Abaminisitiri yo ku wa 26 Kanama yakajije ingamba zo kwirinda Covid-19 nyuma yo kubona ko iki cyorezo kigenda gifata indi ntera, haracyakomeje kugaragara umubare munini w’abantu barenga kuri aya mabwiriza.

Aba bantu bafashwe na polisi begeranye bari kunywa inzoga z’amoko yose birengagije ko muri iki gihe utubari tutemerewe gufungura kubera ingamba zo kwirinda COVID-19.

Amabwiriza yo kwirinda icyorezo cya COVID-19 abuza utubari gufungura imiryango ariko hari bamwe bakomeje gufatwa bayarenzeho.

Ku rundi ruhande,abakozi batatu b’Akarere ka Gatsibo mu Ntara y’Iburasirazuba basezeye mu kazi kabo, nyuma yo gufatirwa mu kabari barenze ku mabwiriza yo kwirinda ikwirakwira ry’icyorezo cya COVID-19.

Ubuyobozi bw’Aka karere bwatangaje ko mu ijoro ryo kuwa 29 rishyira ku wa 30 Kanama 2020, mu Murenge wa Murambi mu Kagari ka Rwimitereri ari ho hafatiwe Abahuzabikorwa ba DASSO.

Meya w’Akarere Gasana Richard, avuga ko mu bakozi b’Akarere bafashwe barenze ku mabwiriza yo kwirinda COVID19 harimo Kaijuka Yussuf Umuhuzabikorwa wa DASSO mu Murenge wa Murambi na Rugamba Sam wa Kiramuruzi.

Gasana yagize ati: “Aba bafashwe bari kumwe n’uwitwa Musabyemariya umucungamutungo wa G.S Rwimitereri mu gihe cya saa mbiri n’igice z’ijoro (8h30 pm). Basanzwe banywa inzoga, barya na burusheti mu kabari k’uwitwa Habumugisha Emmanuel”.

Mu minsi ishize, Umuvugizi wa Polisi y’u Rwanda, CP John Bosco Kabera, yavuze ko abantu bamaze igihe kirekire babwirwa kureka gufungura utubari turimo n’utwo mungo twihishe ariko bamwe bakanga kumva, ikaba ari yo mpamvu hatangiye gufatwa ingamba zikomeye, zirimo kubafata, kubafunga, no kubakurikirana mu butabera.

Yibutsa abantu ko kunywa inzoga bitabujijwe ariko ko uyinywa asabwa kuyigura akayinywera iwe, kandi akirinda guteranya abantu cyangwa kubahamagara ngo baze basangire inzoga.

Ati “Ibintu by’umuco abantu bishyizemo ko inzoga iryoha isangiwe, ntabwo ari byo muri iki gihe turimo kurwanya iki cyorezo.”