skol
startimes

Gasabo: Polisi y’u Rwanda yarashe ukekwagaho gucuruza ibiyobyabwenge,RIB yerekana ukurikiranyweho ibyaha birimo no gushakira inyungu mu mibonano mpuzabitsina y’undi

Amakuru   Yanditswe na: Dusingizimana Remy 10 August 2020 Yasuwe: 1687

Polisi y’u Rwanda ikorera mu karere ka Gasabo yarashe Dominique Ndahimana wakekwagaho gucuruza ibiyobyabwenge ubwo yageragezaga gutoroka, naho mugenzi we wakekwagaho ubujura aratoroka.

Uwarashwe yahise apfa ubwo yageragezaga gutoroka muri kasho ya Polisi iherereye mu murenge wa Ndera mu Karere ka Gasabo.

Uwagerageje gutoroka aracyashakishwa nkuko Polisi yabitangaje.

Ndahimana yari afunzwe nyuma yo gufatanwa udupfunyika 79 tw’urumogi mu gihe Niyigena yakekwagaho ubujura.

Iraswa ryabaye mu gitondo cyo kuri uyu wa Mbere ahagana saa moya n’igice ubwo bari bahawe akanya ko kujya ku bwiherero.

Urwego rw’igihugu rw’ubugenzacyaha (RIB) rwerekanye umugabo w’imyaka 34 wafashwe akurikiranyweho ibyaha bitandukanye birimo gushakira inyungu mu mibonano mpuzabitsina y’undi, kwihesha ikintu cy’undi hakoreshejwe uburiganya, kwiyitirira umwirondoro no gushyiraho umutwe w’abagizi ba nabi cyangwa kuwujyamo.

Ni ibyaha uyu mugabo yakoraga yifashishije telefone dore ko ubwo RIB yamufataga yamusanganye Simcard 10 zibaruje ku ndangamuntu z’abandi nazo yagiye yiba.

Avuga ku bijyanye n’icyaha cyo gushakira inyungu mu mibonano mpuzabitsina y’undi, umuvugizi wa RIB w’umusigire Dr Murangira Thierry yavuze ko uyu mugabo yahuzaga abagabo n’abakobwa ngo basambane ubundi akishyurwa.

Yagize ati “Yasabaga abantu kumushakira abo yitaga abakobwa beza mu rurimi rw’icyongereza yavugaga ngo ni ‘high class’, aho abo bakobwa azajya abahuza n’abagabo bakabasambanya barangiza bakamuha amafaranga, uwo washatse abo bakobwa nawe agahabwa komisiyo".

RIB ivuga ko hari abatangabuhamya babahaye amakuru y’uko yashatse abakobwa akabahuza n’abagabo basambana, abo bagabo bakishyura amadorali 300, uyu mugabo agatwara 200 abakobwa basambanyijwe bagahabwa 100.

Uretse iki cyaha, Dr Murangira yakomeje avuga ko kandi uyu mugabo yagendaga abeshya abantu ko ari umuyobozi wa hoteli zikomeye ko azabaha akazi ubundi akabaka amafaranga.

Ati “Yiyitirira kuba ari umuyobozi w’amahoteli akomeye hano muri uyu mujyi wa Kigali, aho ashishikariza abantu ababwira ko ngo atanga akazi gahemba ibihumbi 150Frw akabasaba ko babanza gutanga ibihumbi 45 kugira ngo bahabwe akazi".

Ku cyaha kijyanye no kurema umutwe w’abagizi ba nabi cyangwa kuwujyamo, RIB ivuga ko uyu mugabo yagikoze binyuze mu kurema amatsinda y’abantu bazajya bamufasha kubona aba bakobwa ashyira abagabo ngo babasambanye.

N’ubwo RIB ivuga ifite ibimenyetso byose byemeza ko uyu mugabo yakoze ibi byaha byose, we arabihakana akavuga ko atigeze ahuza abagabo n’abakobwa ngo basambane.

Yagize ati “Icyo cyaha muvuga cyo kugurisha abakobwa, icyo cyaha ntabwo nkemera”.

Uyu mugabo ngo icyo yemera n’uko “yigeze guhurira n’umukobwa biganye mu kabari, ubundi umugabo bari kumwe nawe yari yasanze muri ako kabari akamusaba ko yabahuza”.

Ibintu uyu mugabo avuga ko nta kubahuza kundi kwabayeho kuko ubwabo bari bamaze kumenyana.

RIB yavuze ko atari ubwa mbere uyu mugabo atabwa muri yombi kubera ibyaha nk’ibi kuko no mu 2019 yigeze gukurikiranwa ndetse aranafungwa kubera ibyaha bisa n’ibi.

RIB yashimye ubufatanye abaturage bagaragaje kugira ngo uyu mugabo afatwe ikanaboneraho no gusaba abantu bose cyane cyane urubyiruko kwirinda gushorwa mu busambanyi no kubeshywa ko bagiye gushakirwa akazi.


Uyu niwe ukekwaho byaha birimo gushakira inyungu mu mibonano mpuzabitsina y’undi

Source:IGIHE

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Nyabihu: Umumotari yafatanwe imifuka irimo urumogi ashaka gutema...

Polisi y’u Rwanda ikorera mu turere twa Kirehe na Nyabihu yafashe ibiro 102...
29 November 2020 Yasuwe: 1192 0

Kicukiro: Inzu y’umuyobozi w’Umudugudu yahiye ku manywa y’ihangu...

Ku gicamunsi cyo kuri uyu wa Gatanu tariki ya 27 Ugushyingo 2020,inzu...
27 November 2020 Yasuwe: 6220 0

Sergeant Robert ushinjwa gusambanya umwana we ari gushaka ubuhungiro muri...

Umusirikare akaba n’umuririmbyi wamenyekanye mu itsinda ry’umuziki ry’ingabo...
26 November 2020 Yasuwe: 3792 0

NYABIHU: Umumotari yafatanwe urumogi yari yavanze n’amakara

Mu gitondo cyo kuri uyu wa Mbere tariki ya 23 Ugushyingo Polisi y’u Rwanda...
25 November 2020 Yasuwe: 665 0

Gasabo: Umugabo yatawe muri yombi akekwaho gusambanya nyina ku...

Umugabo witwa Bakundukize w’imyaka 41 y’amavuko, ari mu maboko ya RIB Post ya...
24 November 2020 Yasuwe: 2103 0

Biravugwa ko Sergeant Robert ukekwaho gusambanya umwana we yatorokeye muri...

Sergeant Major Kabera Robert uzwi mu muziki nka “Sergeant Robert” uri...
24 November 2020 Yasuwe: 7196 0