Impunzi eshanu z’ Abanyekongo zapfiriye mu myigaragambyo mu Rwanda

Amakuru   Yanditswe na: Nsanzimana Ernest 23 February 2018 Yasuwe: 3813

Igikorwa cyo guhoshya imyigaragambyo y’ impunzi z’ Abanyekongo yari imaze iminsi ibera mu karere ka Karongi cyaguyemo impunzi eshanu hakomereka impunzi 20 n’ abapolisi 7, impunzi 15 zitabwa muri yombi.

Iyi myigaragambyo yatangiye ku wa Kabiri w’ iki cyumweru tariki 20 ubwo impunzi zibarirwa hagati ya 500 na 1000 zasohokaga mu nkambi ya Kiziba zivuga ko zisuye iwabo muri Repubulika ya Demukarasi ya Congo nyamara zikerekeza ku biro by’ ishami ry’ umuryango w’ abibumbye ryita ku mpunzi UNCHR mu karere ka Karongi.

Mu gitondo cyo kuri uyu wa 23 Gashyantare 2018, nibwo Umuvugizi wa Polisi y’ u Rwanda yavugiye kuri Radiyo y’ igihugu ko guhosha iyo myigaragambyo yari imaze amasaha arenga 48 haguyemo impunzi 5.

CP Theos Badege ati: "Abakomeretse ba mbere ni abapolisi bateraguwe amabuye n’ibyo byuma, ariko tumaze kureba twaje gusanga harimo abo bigaragambyaga 20 bakomeretse, hari n’abapolisi 7, twaje no kumenya ko... twanabibonye bageze kwa muganga, hari batanu muri abo bigaragambyaga kubera izo nguma bitabye Imana, ariko nk’uko harimo n’igikorwa cyo kubahiriza amategeko hariho n’abandi 15 ubu bari mu maboko ya Polisi bafunze bari mu maboko y’ubutabera mu gihe abantu bakireba uruhare rwabo muri ibyo byose byakozwe n’ibyaraye bikozwe mu gusuzugura no kurwanya inzego z’umutekano."

Ibi byabaye ku mugoroba wo kuri uyu wa 22 gashyantare nyuma y’ amasaha make UNCHR ishami ry’ u Rwanda isohoye itangazo isaba izo mpunzi kubaha amategeko y’ u Rwanda aho yanasabaga Leta y’ u Rwanda kudakoresha ingufu z’ umurengera.

Polisi y’ u Rwanda igaragaza ko izi mpunzi zakoresheje amabuye n’ ibyuma, polisi igakoresha ingufu yise ’zikenewe’ nubwo itagaragaza izo ngufu izo arizo.

Nubwo bimeze gutyo ariko ibinyamakuru by’ imbere mu gihugu byageze aho izi mpunzi zari zikambitse bitangaza ko mu guhosha izo mpururu hakoreshejwe ibyuka biryana mu maso ndetse ngo hanumvikanye urusaku rw’ amasu.

Ikambi ya Kiziba icumbikiye impunzi zirenga ibihumbi 16 z’ Abanyekongo zimaze imyaka isaga 20 mu Rwanda. Izi mpunzi zigaragambyaga zivuga ko zifite ikibazo cy’ imibereho mibi aho ziri mu kambi. Mu kwezi gushize kwa Mutarama nibwo hafashwe icyemezo cyo kugabanya amafaranga agenerwa buri mpunzi imwe akava ku bihumbi 7 akagera kuri 5000. Ibi ngo byatewe n’ uko imiryango ntera nkunga irimo n’ ishami ry’ umuryango w’ abibumbye ryita ku biribwa FAO yagabanyije inkunga kugera kuri 20%.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Imyitozo mpuzamahanga yo gusuzuma no kongerera abasirikare ubushobozi igiye...

Mu Karere ka Bugesera I Gako hatangijwe imyitozo ya gisirikari yiswe...
14 August 2018 Yasuwe: 678 1

Gicumbi: Umwana wanyweye ubushera mu bukwe bwa pasiteri yapfuye abarenga...

Abantu 260 mu batashye ubukwe bw’ umuhungu w’ umupasiteri wo mu murenge bo mu...
14 August 2018 Yasuwe: 1750 0

Abaturage batunze agatoki umugabo ucuruza urumogi afatanwa udupfunyika 7...

Polisi y’u Rwanda ikorera mu karere ka Rubavu ku itariki ya 08 Kanama...
13 August 2018 Yasuwe: 685 0

Nyamirambo: Abasore bapfuye F200 bararwana umwe bimuviramo urupfu

Abasore bo mu mudugudu wa Kiberinka Akagari ka Rugarama Umurenge wa...
12 August 2018 Yasuwe: 3871 0

Umunyarwakazi yishe umwana we amwihambira mu kirundo cy’ amabuye

Umubyeyi wo mu karere ka Musanze mu amajyaruguru y’ u Rwanda w’ abana bane...
11 August 2018 Yasuwe: 4550 0

Rubavu: Umusirikare warashe abaturage 3, umwe agapfa yafashwe

Amakuru agera ku UMURYANGO aremeza ko Umusirikare witwa Ngendahimana Jean...
11 August 2018 Yasuwe: 4613 1