Umurambo w’ umukobwa w’ inkumi utambaye wabonetse mu kagari ka Nyamabuye, Umurenge wa Gatsata akarere ka Gasabo mu gitondo cyo kuri uyu wa 5 Kamena 2018, abaturage baravuga ko yafashwe ku ngufu n’ abasore batatu bakamwica.

Sponsored Ad

Abaturage baravuga ko uyu mukobwa yatwawe n’ abasore batatu bamufata ku ngufu barangije baramuniga arataka, ngo atatse hari umuturage wagiye kureba ibibaye bamubonye bariruka.

Uyu murambo wabonetse mu gihuru mu gashamba kari haruguru y’ umuhanda.

Umunyamabanga nshingwabikorwa w’ umurenge wa Gatsata Ntiyamira Faustin yatangarije UMURYANGO ko nyakwigendera yari mu kigero cy’ imyaka 20 yongeraho bagiye kuhashyira amarondo bakanakuraho ibihuru bakoresheje umuganda kugira ngo birinde ko hari abantu bakwihishamo.

Ntiyamira yemeje amakuru avuga ko umurambo w’ uyu mukobwa basanzwe wambaye ubusa nk’ ikimenyetso cy’ uko yafashwe ku ngufu. Gusa ngo hari abafashwe bakekwaho ubwo bugizi bwa nabi.

Yagize ati "Yari mu kigero cy’ imyaka hagati ya 18 na 20 kuko nta byangombwa twamusanganye. Twasanze yapfuye ariko hari abantu batatu bakekwa ko aribo babikoze twabohereje kuri polisi kugira ngo ibakurikarane ibabaze imenye niba aribo babigizemo uruhare."

Saa yine za mu gitondo ubwo Ntiyamira yavuganaga n’ umunyamakuru w’ UMURYANGO bari bagitegereje imodoka ya polisi ngo itware umurambo wa nyakwigendera.