Padiri Libelle KAMBANDA wari Umuyobozi wa Caritas muri Diyosezi ya Butare yitabye Imana muri iri joro ryakeye azize ibikomere yatewe n’impanuka y’imodoka yari arimo yabereye ahitwa Kirengere mu Karere ka Ruhango, umushoferi wari umutwaye ukekwaho gukora amakosa yateje iyi mpanuka akaba yahise atoroka.

Sponsored Ad

Umuvugizi wa Polisi ishami rishinzwe umutekano wo mu muhanda, SSP Jean Marie Ndushabandi yatangarije Umuryango ko imodoka Padiri yari arimo yakoze impanuka biturutse ku makosa y’umushoferi wari umutwaye, ndetse wahise anatoroka impanuka imaze kuba.

Mu modoka Padiri yari ari kumwe n’abantu batatu. Padiri akana yitabye Imana ageze kwa muganga i Kagyayi, undi bari kumwe we akaba yakomeretse akiri mu bitaro naho umushoferi wari ubatwaye akaba yatorotse.

Yagize ati:" ni imodoka ebyiri zagonganye, Padiri yari mu modoka yo mu bwoko Toyota Hilux Vigo, umushoferi wayo yahise atoroka, niwe wari mu makosa, undi ubu ari kwa muganga naho Padiri yitabye Imana ageze kwa muganga".

Imodoka Padiri yari arimo yanyuze kuyo byari bishoreranye ihita igonga indi yo mu bwoko bwa Dyna yari iturutse imbere mu wundi mukono ijya Kigali. Padiri n’abo bari kumwe bavaga Kigali berekeza Huye.

Nyakwigendera Padiri Kambanda (uri hagati) ubwo yari mu birori byo kwishimira Impamyabumenyi y’icyiciro cya kabili cya Kaminuza ari kumwe n’abandi bihayimana

Padiri Kambanda yakoze muri Seminari Nto Virgo Fidelis ari Umuyobozi Ushinzwe Amasomo. Akaba yarahawe isakaramentu ry’Ubusaseridoti muri 2011. Umupadiri bakoranye imyaka igera ku munani yatangarije Umuryango ko yari umuntu mwiza ubana n’abandi neza uzi n’ubwenge cyane.

Padiri Kambanda yafatanyaga inshingano zo kuyobora Caritas ya Diyoseze ya Butare no gukurikirana amavuriro n’ibitaro bya Kiliziya Gatulika biri muri Diyosezi ya Butare.

SSP Ndushabandi yatangarije Umuryango ko abari mu modoka yagonganye n’iyo Padiri yari arimo ntacyo babaye.