Abafana ibihumbi n’ibihumbi nibo bakiriye ikipe ya Real Madrid ubwo yari ikubutse I Kiev muri Ukraine,kwegukana igikombe cya 13 cya UEFA Champions League nyuma yo gutsinda ikipe ya Liverpool ibitego 3-1.

Sponsored Ad

Kuri iki Cyumweru,nibwo abakinnyi ba Real Madrid bakoze umutambagiro wo kwerekana iki gikombe begukanye,aho bakiriwe n’abafana ibihumbi n’ibihumbi bari bateraniye mu mugi wa Madrid kugira ngo babakomere amashyi y’urufaya.

Aba bafana bari bateraniye ahitwa Puerta del Sol,bari benshi cyane ndetse bashimishije aba basore bakoze amateka yo kwisubiza igikombe cya UEFA Champions League ku nshuro ya 3.

Abakinnyi batandukanye barimo Sergio Ramos,Marcelo na Cristiano Ronaldo bashimiye aba bafana kuba baje kubashyigikira ndetse bagiye gukomeza kubaha ibyishimo.

Ronaldo yavuze ko yishimiye kuba akinira ikipe ya mbere ku isi,ndetse abwira abafana ko abahishiye byinshi,byatumye benshi bishima cyane kuko I Kiev yari yatangaje ko ashobora gusohoka muri iyi kipe y’ubukombe.

Umusore Gareth Bale wigaragaje muri uyu mukino,yagaragaye atishimye ndetse nubwo bagenzi be basekaga we ku maso ye wabonaga atanezerewe,byatumye benshi bemeza ko ashobora kuva muri iyi kipe.