Abanya Nigeria bakunda umupira w’amaguru ntibanyuzwe n’umwanya wa 3 ikipe yabo y’igihugu yabonye mu gikombe cya Afurika aho bashinja umutoza wabo Gernot Rohr kubatsindisha akoresha umunyezamu w’umuswa Akpeyi kandi Francis Uzoho ariwe muhanga cyane.

Sponsored Ad

Umunyezamu Uzoho yaraye yigaragaje cyane mu mukino ikipe ya Nigeria yatsinzemo Tunisia igitego 1-0 mu mukino wo guhatanira umwanya wa 3 bituma benshi bemeza ko kutagera ku mukino wa nyuma wa AFCON byatewe n’umunyezamu wahawe umwanya Akpeyi.

Nigeria yatsinze Tunisia igitego 1-0 cyatsinzwe na Odion Ighalo ku munota wa 3 w’umukino,bituma iyi kipe y’ubukombe icyura umwanya wa 3 mu gikombe cya Afurika cyane ko yasezerewe na Algeria muri ½ cy’irangiza ku bitego 2-1.

Ighalo yahise agira ibitego bitanu, bizasaba Riyad Mahrez na Adam Ounas ba Algeria cyangwa Sadio Mané wa Senegal gutsinda hejuru y’ibitego bibiri ku mukino wa nyuma ngo bamuceho, kuko bo bafite bitatu.

Nigeria ifite igikombe cya Afurika inshuro eshatu, ubu ni inshuro ya munani ibaye iya gatatu muri iri rushanwa mu gihe Tunisia iheruka iki gikombe mu 2004 gikinirwa iwayo.

Francis Uzoho waraye akinnye umukino we wa mbere mu gikombe cya Afurika yishimiwe bikomeye n’Abanya Nigeria kubera ibitego byinshi bya Tunisia yakuyemo, bituma bifatira ku gahanga umutoza wabo bavuga ko atashishoje mu gukoresha Akpeyi mu mikino ishize.

Tunisia yashoboraga kwishyura Nigeria,ariko umunyezamu Uzoho abera ibamba ba rutahizamu barimo Ferjani Sassi na Ghailene Chaalali bamwokejeje igitutu.

Mu butumwa bwinshi bwo kuri Twitter,abanya Nigeria benshi bavuze ko uko Uzoho yitwaye bigaragaza ko ariwe wari mwiza kurusha Akpeyi ndetse bemeza ko batari gutsindwa na Algeria iyo aza gukina.