Abafana ba ruhago mu Burundi bababajwe ni uko Jules Ulimwengu aherutse gutangaza ko Uburundi bukeneye rutahizamu umeze nka Kagere Meddie kandi basanzwe bafite abakina kure nka Saido berahino wa Stoke City,Abdul Razak Fiston, Cedric Amissi, hamwe Hussein Tshabalala.

Sponsored Ad

Rutahizamu Jules Ulimwengu aherutse gutangaza ko akunda rutahizamu Kagere Meddie cyane ndetse ariyo mpamvu ikomeye asigaye yishimira igitego ahishe ijisho nkuko uyu munyarwanda ukinira Simba SC akunze kubigenza.

Kuwa 20 Gashyantare uyu mwaka nibwo Ulimwengu yabwiye Radio Isango Star ko akurikirana buri munsi Kagere Meddie ndetse yemeza ko mu ikipe y’igihugu y’u Burundi nta muntu wamwicaza ku ntebe y’abasimbura.

Aya magambo ntiyishimiwe na bamwe mu Barundi nkuko ikinyamakuru Indundi.com kibitangaza,aho bamwe bamushinje gusuzugura ikipe y’igihugu kandi ihagaze neza muri iyi minsi.

Bamwe mu bafana bavuze ko ubwibone bwatangiye gutaha uyu Murundi mugenzi wabo kubera ibitego bibiri amaze gutsindira Rayon Sports muri shampiyona,kuva yayigeramo avuye muri Sunrise FC.

Ulimwengu niwe uyoboye ba rutahizamu mu Rwanda muri shampiyona n’ibitego 11 ndetse amaze kwigarurira abafana b’iyi kipe kuko imikino yose yakinnye yatsinze ibitego.