Ikipe ya Arsenal imaze gusinyisha myugariro w’Umusuwisi w’imyaka 34 Stephan Lichtsteiner imukuye mu ikipe ya Juventus ku buntu.

Sponsored Ad

Uyu myugariro warangije amasezerano ye mu ikipe ya Juventus nyuma y’imyaka 7 yari ayimazemo,abaye umukinnyi wa mbere umutoza Unai Emery asinyishije nyuma yo kugera muri Arsenal asimbuye Wenger wari umaze muri iyi kipe imyaka 22.

Uyu musore usanzwe ari kapiteni w’Ubusuwisi,azambara nimero 12 mu ikipe ya Arsenal ndetse byitezwe ko agiye kongera ingufu mu bwugarizi bwa Arsenal bwarangije umwaka w’imikino bujegajega.

Akimara gusinyira Arsenal, Stephan Lichtsteineryagize ati “Ni ibyishimo n’icyubahiro kuba umukinnyi wa Arsenal.Tugomba gukora cyane kugira ngo tuzafashe iyi kipe nziza gutwara ibikombe.”

Umutoza Unai Emery yemeje ko uyu musore agiye gufasha Arsenal kugira ubunararibonye mu bwugarizi ndetse no gufasha ba nyugariro guhagarara neza.

Amakipe Stephan Lichtsteiner yanyuzemo:
Grasshoppers (2001-2005),
Lille (2005-2008),
Lazio (2008-2011),
Juventus (2011-2018),
Arsenal (2018-)

Ibikombe yatwaye:
7x Serie A ( 2011-18),
5x Coppa Italia (2009, 2015, 2016, 2017, 2018),
4x Italian Super Cup (2010, 2013, 2014, 2016),
2002/03 Swiss League

Lichtsteiner yakinye imikino 565 mu makipe yose yakiniye,atsinda ibitego 29,atanga imipira ivamo ibitego 49 mu gihe ikipe y’igihugu y’Ubusuwisi yayikiniye imikino 99.