skol
fortebet

AS Kigali ishenguye imitima y’abakunzi ba Kiyovu Sports ibatwara igikombe cy’Amahoro 2019

Yanditswe: Thursday 04, Jul 2019

Sponsored Ad

Abakunzi ba Kiyovu Sports bari baje kuri stade ya Kigali I Nyamirambo n’iyonka baje kwegukana igikombe cy’Amahoro baherukaga gutwara mu mwaka wa 1985 cyitwa Trophee Habyarimana,batashye bababaye kuko AS Kigali ibatsinze ibitego 2-1 nyuma y’iminota 120 y’umukino.

Sponsored Ad

Ubwinshi bw’abakunzi ba Kiyovu Sports bari buzuye stade ya Kigali ntibwakanze AS Kigali,kuko ibashije kwegukana igikombe cy’Amahoro ku ntsinzi y’ibitego 2-1 ibonye yiyushye akuya.

Kiyovu Sports iheruka igikombe icyo aricyo cyose mu mwaka wa 1993,itsindiwe ku mukino wa nyuma w’igikombe cy’Amahoro yari yaje yiteguye gutwara na AS Kigali mu mukino yayobonye mu minota 90 ibanza.

Imbere y’abafana bayo bari bafite inyota,Kiyovu Sports yafunguye amazamu ku munota wa 38 ibifashijwemo na Rwabuhihi Aime Placide ndetse ijya kuruhuka iyoboye n’igitego 1-0.

AS Kigali yatwaye igikombe cy’Amahoro 2013,yagarutse mu gice cya kabiri yariye karungu niko kwiba umugono Kiyovu Sports,iyitsinda igitego ku munota wa 54 gitsinzwe na Niyomugabo Jean Ckaude,ku ishoti rikomeye yateye nyuma yo guherezwa umupira mwiza na Nsabimana Eric ’Zidane’.

Nyuma yo kunganya igitego 1-1,amakipe yombi yatangiye gucungana cyane buri wese yirinda ko undi yamubanza igitego,bituma iminota 90 y’umukino irangira ari 1-1.
Umusifuzi Mukansanga Salma yahise ategeka amakipe yombi kugaruka mu kibuga bagakina indi minota 30 nkuko amategeko abiteganya iyo habayeho kunganya mu minota 90 ku mukino wa nyuma w’igikombe cy’Amahoro.

Kiyovu Sports yatangiraye uburangare bwinshi yahushijwe igitego cyari cyabazwe ku munota wa 91 w’umukino na Nsabimana Eric wateye umupira n’umutwe ugakurwamo na Nzeyurwanda Djihad.

Nyuma yo guhusha iki gitego,Nsabimana Eric yahise yikosora ku munota wa 93 atsindira AS Kigali igitego cy’intsinzi,nyuma yo gucenga ba myugariro ba Kiyovu Sports ntibabashe kumuhagarika.

AS Kigali ikimara kubona iki gitego yahise itangira kureba uko yafunga izamu ryayo gusa na Kiyovu Sports ntiyongeye kubona amahirwe menshi bituma umukino urangira ku ntsinzi ya AS Kigali y’ibitego 2-1.

Abafana ba Kiyovu Sports bari bizeye cyane igikombe bitewe ahanini n’ukuntu baje bambaye imipira yanditseho ko ari aba Champions,batashye batishimye kuko icyizere cyo guhagarika imyaka 21 badatwara igikombe kiyoyotse. N’inshuro ya gatanu Kiyovu Sports igeze ku mukino wa nyuma w’Igikombe cy’Amahoro igatsindwa.

AS Kigali nyuma yo gutwara iki gikombe,ihise ibona amahirwe yo kuzahagararira u Rwanda mu mikino ya CAF Confederations Cup ibifashijwemo n’umutoza wayo usanzwe yungiriza Mateso Jean de Dieu.

Nanone mu bagore ikipe ya AS Kigali niyo yegukanye igikombe cy’Amahoro itsinze Scandnavia igitego 1-0 cyatsinzwe na Ibangarye Anne Marie.



AS Kigali yishe ibirori by’abafana ba Kiyovu Sports bari baje ku kibuga ku bwinshi

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa