Ikipe ya Police FC yateye intambwe itajegajega iyigeza muri ½ cy’igikombe cy’Amahoro kuko yasanze Seninga Innocent I Rubavu imubuza gukomerwa amashyi n’abafana ba Etincelles FC mu gihe AS Kigali yigaranzuye Gasogi ku kaburembe.

Sponsored Ad

AS Kigali yari yakiriye Gasogi FC mu mukino ubanza wa ¼ cy’igikombe cy’Amahoro,yagowe cyane n’uru rubyiruko rwo mu cyiciro cya kabiri kuko rwayinjije igitego hakiri kare ku munota wa 25 w’umukino gitsinzwe na Rugamba Jean Baptiste.

AS Kigali yazanye akabukuru mu gice cya kabiri,ihita yihaniza Gasogi United,iyitsinda ibitego bibiri ibifashijwemo na Cyitegetse Bogard ku munota wa 59 hanyuma myugariro Bishira Latif ashyiramo icya kabiri ku munota wa 86.Imipira yose yavuyemo ibitego yatanzwe na Nova Bayama.

Ku rundi ruhande Police FC yanze ko Seninga Innocent wahoze ayitoza akorerwa ibirori n’abafana ba Etincelles FC bishimiye ko yabagarukiye,kuko yabatsinze ibitego 2-0 biyihesha amahirwe menshi yo kuba yagera muri ½ kuko azayakira I Kigali muri weekend.

Indi mikino ya ¼ izaba ku munsi w’ejo, Rayon Sports yakira Gicumbi FC mu gihe Intare FC zizakira Kiyovu Sports.