Kuri uyu wa Gatandatu ku saa mbili na mirongo ine n’itanu abakunzi b’umupira w’amaguru ku Isi yose bahanze amaso I Cardiff mu gihugu cya Wales ahaza kubera umukino wa nyuma ku makipe yabaye aya mbere iwayo ku mugabane w’I Burayi “UEFA Champions League” umukino uzahuza ikipe ya Real Madrid yo mu gihugu cya Espagne izahura na Juventus de Turin yo mu Butaliyani.
Ikipe ya Real Madrid ifite iki gikombe inshuro 11, muri zo harimo iyo yatsinze Juventus mu 1998 igitego kimwe ku busa, iraza gukina (...)

Sponsored Ad

Kuri uyu wa Gatandatu ku saa mbili na mirongo ine n’itanu abakunzi b’umupira w’amaguru ku Isi yose bahanze amaso I Cardiff mu gihugu cya Wales ahaza kubera umukino wa nyuma ku makipe yabaye aya mbere iwayo ku mugabane w’I Burayi “UEFA Champions League” umukino uzahuza ikipe ya Real Madrid yo mu gihugu cya Espagne izahura na Juventus de Turin yo mu Butaliyani.

Ikipe ya Real Madrid ifite iki gikombe inshuro 11, muri zo harimo iyo yatsinze Juventus mu 1998 igitego kimwe ku busa, iraza gukina ishaka guca agahigo ko kuba ikipe ya mbere itwaye iki gikombe 2 kikurikiranya nyuma yaho cyiswe “UEFA Champions League” mu mwaka wa 1992 mu gihe ikipe ya Juventus ifite iki gikombe inshuro 2 aho igiheruka mu mwaka wa 1996 itsinze Ajax Amsterdam kuri penaliti nyuma yaho umukino wari warangiye ari 1-1.

Aya makipe yombi agiye guhura yaramaze gutwara ibikombe bya shampiyona iwayo yitezweho gukina umukino mwiza cyane kuko yombi afite abakinnyi basatira bakomeye nka Cristiano Ronaldo na Benzema ba Real Madrid ndetse na Gonzalo Huguain na Paulo Dybala ba Juventus.

Muri uyu mwaka ikipe ya Real Madrid yatsinze ibitego 106 yinjizwa 41 mu mikino 38 ya shampiyona ya Espagne “ La Liga”mu gihe Juventus muri “Serie A” yatsinze ibitego 77 yinjizwa 27 mu mikino 38.

Muri UEFA Champions League ikipe ya Real Madrid yatsinze ibitego 32 yinjizwa 17 mu mikino 12 mu gihe Juventus yatsinze ibitego 21 yinjizwa 3 bishimangira ko ubwugarizi bwa Buffon,Bonucci,Chiellini na Barzagli buri hejuru gato y’ubwa Real Madrid buyobowe na Sergio Ramos.

Nubwo ubu bwugarizi bwa Juventus bwibazwaho na benshi uko buzahagarika Cristiano na bagenzi be,igihanzwe amaso kurushaho n’intambara y’abanya Brazil babiri Marcelo na Dani Alves bazwiho gusatira cyane nubwo bakina nk’abugarira aho bamwe bavuze ko uzabasha kwigaranzura undi nta kabuza azegukana igikombe cya UEFA champions League kiri gukinwa ku nshuro ya 61.

Juventus niramuka itwaye iki gikombe iraba ibaye ikipe ya 8 ibashije gutwara ibikombe bitatu muri kiciro kimwe (shampiyona,Champions League n’igikombe cy’igihugu) aho kugeza magingo aya yamaze gutwara shampiyona n’igikombe cy’igihugu. Nibikora iziyongera kuri Celtic (1966/67), Ajax (1971/72), PSV Eindhoven (1987/88), Manchester United (1998/99), Barcelona (2008/09 na 2014/2015), Inter Milan(2009/10) na Bayern München (2012/13).
Mu mikino ya Champions League aya makipe amaze guhura inshuro 18 aho yabashije gutsindana inshuro 8 buri imwe anganya 2 mu gihe Juventus ariyo imaze kwinjiza ibitego byinshi mu mikino imaze guhuza aya makipe yombi 21 kuri 18 bya Real Madrid.
Uyu mukino ukaba uzasifurwa n’umudage Felix Brych aho azaba afananyije na Mark Borsch na Stefan Lupp nabo b’Abadage mu gihe komiseri w’umukino ari umu Seribe Milorad Mazic.
Umukinnyi utazagaragara kuri uyu mukino ku ruhande rwa Real Madrid ni Pepe mu gihe Juventus abakinnyi bayo bose bahari.

Abakinnyi bashobora kubanza muri uyu mukino:

Ku ruhande rwa Real Madrid ni :Keylor Navas; Dani Carvajal, Sergio Ramos, Raphael Varane, Marcelo; Toni Kroos, Casemiro, Luka Modric, Isco; Karim Benzema na Cristiano Ronaldo

Ku ruhande rwa Juventus ni : Gianluigi Buffon; Dani Alves, Leonardo Bonucci, Giorgio Chiellini, Alex Sandro; Miralem Pjanic, Sami Khedira, Juan Cuadrado, Paulo Dybala, Mario Mandzukic na Gonzalo Higuain.

Remy Dusingizimana