Ikipe ya Chelsea ishobora gufatirwa ibihano bikarishye na FIFA birimo kumara imyaka 2 itagura abakinnyi kubera kugura umunya Burkina Faso Bertrand Traore mu buryo bunyuranyije n’amategeko kuko yaguzwe atarageza ku myaka 18 y’amavuko.

Sponsored Ad

Mu mwaka wa 2011 nibwo Chelsea yaguze uyu musore imukuye mu ikipe yitwa AJEB y’iwabo,gusa igurwa ry’uyu musore wari ukiri muto cyane ntiryanyuze FIFA byatumye itangira iperereza rimaze imyaka 3 rikorwa,none basanze uyu mukinnyi yarageze muri iyi kipe atagejeje ku myaka 18.

Bertrand Traore agiye gutuma Chelsea ifatirwa ibihano bikomeye

FIFA ivuga ko umwana utarageza imyaka 18 atagomba kurenga ibirometero 50 avuye iwabo ajya gukina ahandi bityo Chelsea FC yararyishe igura Bertrand Traore afite imyaka 16.

Chelsea yishyuye ibihumbi 154 by’amapawundi umubyeyi wa Bertrand Traore ndetse baha ibihumbi 13 agakipe yakiniraga muri Burkina Faso kitwa AJEB,gusa iri mu mazi abira kuko uyu mukinnyi yagurishije muri Lyon yayikiniye amarushanwa y’abana akiri muto gusa Chelsea FC yo yemeza ko yari mu igeragezwa,nta masezerano yari afite.

Arsenal yandikiye FIFA iyimenyesha ko Chelsea yakinishije Bertrand mu buryo butemewe n’amategeko mu makipe y’abana mu mwaka wa 2011,bituma itangira guperereza ndetse biravuga ko uretse na Traore hari abandi bakinnyi iyi kipe yaguze mu buryo butemewe.

Nubwo FIFA itashyize hanze ibyerekeye iri perereza,amakuru yagiye hanze ni uko Chelsea ishobora guhagarikwa kumara amasoko 4 angana n’imyaka 2 itagura umukinnyi n’umwe kubera kugura abakinnyi batujuje imyaka 18.

Biramutse bibaye Chelsea FC yaba ibaye nka Real Madrid,Atletico Madrid na FC Barcelona nazo zafatiwe ibihano bimeze gutya kubera kugura abakinnyi bato.