Amaso yose y’abakunzi ba ruhago ahanzwe ku kibuga Allianz Arena uyu munsi saa 20h45 ubwo ikipe ya Bayern Munich irahura na Real Madrid mu mukino ubanza wa ½ cya UEFA Champions League.

Sponsored Ad

Byinshi byavuzwe ndetse birandikwa gusa itandukaniro ry’uyu mukino riraba umutoza wa Bayern Munich Jupp Heynckes watoje aya makipe yombi ndetse agafasha Real madrid guca ingoyi yari iyiboshye ubwo yari imaze imyaka 32 idatwara UEFA Champions League akayiyihesha mu mwaka wa 1998.

Benshi bahanze amaso Ronaldo umuze gutsinda igitego muri buri mukino wa UCL uyu mwaka

Mu myaka 2 ishize,Real Madrid yasezereye Bayern Munich ndetse iyinyagiye aho benshi bibaza niba n’uyu mwaka ariko biza kugenda gusa bakemeza ko hari byinshi byahindutse muri iyi kipe ya Bavaria nyuma yo kugaruka kwa muzehe Heynckes.

Bayern yamaze gutwara igikombe cya Bundesliga ndetse n’icy’igihugu,irifuza gusezerera Real Madrid igatwara ibikombe 3 uyu mwaka mu gihe Real Madrid iki ari cyo gikombe icungiyeho.

Cristiano Ronaldo iturufu Zinedine Zidane yifuza gukina muri iri joro amaze gutsinda ibitego 15 mu mikino ya Champions League y’uyu mwaka ndetse yibasira bikomeye ikipe ya Bayern Munich kuko amaze kuyitsinda ibitego 9 mu mukino yose yahuye nayo.

Bayern Munich irashaka kwikuraho igisuzuguriro cya Real Madrid

Ronaldo yatsinze igitego muri buri mukino wa Champions League yakinnye uyu mwaka ndetse umutoza Heynckes yemeje ko ari umukinnyi ikipe ye igomba kwitondera muri iri joro.

Real Madid na Bayern bamaze guhura inshuro 25 zose ndetse buri kipe yatsinze indi imikino 11 aho uyu munsi ari inshuro ya 3 bagiye guhurira muri ½ ,Bayern yasezereye Real Madrid mu mwaka wa 2011-2012,Real iyisezerera mu mwaka wa 2013-2014.

Bayern Munich imaze gutakaza imikino 5 yikurikiranya iheruka guhura na Real madrid mu mikino yo gukuranamo muri Champions League zirimo 3 muri ½ n’imikino 2 muri ¼.

Jupp Heynckes amaze gutsinda imikino 14muri 16 amaze gukinira ku kibuga cya Allianz Arena mu mikino ya Champions League ndetse yabashije gutsinda iibitego 48 yinjizwa 10 gusa.

Ibyo abatoza batangaje:

Zinedine Zidane “Nishimiye cyane ibyo Jupp Heynckes yagezeho mu ikipe ya Bayern ndetse no muri Real Madrid,niyo mpamvu tugomba gukina neza kugira ngo tubashe gutsinda.Bayern ni ikipe ikomeye kandi ihorana inyota yo gutsinda gusa ndabizi nitwe dufite amahirwe.”

Jupp Heynckes “Ntabwo abatoza benshi bageze kuri aka gasongero ndiho,njye ndi umunyamahirwe.Uyu mukino ndawukina nta marangamutima mfite.Uraba ari umukino ubereye ijisho.Nahuye n’abatoza bakomeye nka Marcelo Lippi na Johan Cruyff gusa kuri ubu nshimishwa na Zinedine Zidane.Nkunda uko ikipe ya Real Madrid isigaye ikina kubera we.”

Abakinnyi bashobora kubanza mu kibuga ku mpande zombi:
Bayern Munich: Ulreich; Kimmich, Hummels, Boateng, Alaba; Martínez, Thiago; James, Müller, Ribéry; Lewandowski.

Abadahari: Vidal na Coman

Abashidikanywaho:Neuer,Alaba naTolisso

Real Madrid: Navas; Carvajal, Varane, Ramos, Marcelo; Kroos, Casemiro, Modrić, Isco; Benzema, Ronaldo.

Udahari:Nacho Fernandez

Umusifuzi:Bjorn Kuipers (Umuholandi)