Nkuko yabigenje mu matsinda,KCCA yasubiriye AZAM FC iyitsinda igitego 1-0 ku mukino wa nyuma wa CECAFA Kagame Cup,itwara iki gikombe cyari kimaze imyaka 13 kitagera ku butaka bwa Uganda.

Sponsored Ad

Mu mukino wa nyuma wabereye kuri Stade ya Kigali I Nyamirambo kuri iki Cyumweru,KCCA yagaragaje imbaraga zidasanzwe, yatsinze igitego 1-0 AZAM FC bari kumwe mu itsinda B ryakiniye I Huye.Mu mukino wahuje aya makipe mu itsinda B,KCCA yatsinze AZAM FC igitego 1-0 cya Anut Sadat.

KCCA yaruhije bigaragara AZAM FC,yatsinze igitego kimwe rukumbi cyabonetse muri uyu mukino ku munota wa 63 gitsinzwe na Mustafa Kizza ku mupira yatereye inyuma gato y’urubuga rw’amahina,umunyezamu WA AZAM ntabashe kuwubona neza kubera ko yakingirijwe na ba rutahizamu ba KCCA.

KCCA ikimara gutsinda iki gitego yagerageje kugarira nk’ibisanzwe ku ikipe ibonye igitego ku mukino wa nyuma,birangira itsinze umukino gusa mu minota 3 y’inyongera Azam FC yashyize igitutu ku ikipe ya KCCA ibona koruneri eshatu zitagize icyo ziyifasha.

AZAM FC yatwaye CECAFA Kagame Cup 2 ziheruka,yashakaga gutwara iya 3 yikurikiranya ntibyayikundira kuko yatsinzwe na KCCA yagaragaje imbaraga zidasanzwe ikuramo Rayon Sports muri ¼ na Green Eagles muri ½ .

KCCA yaherukaga kwegukana CECAFA mu 1978 ubwo yatsindaga Simba SC kuri penaliti nyuma yo kunganya ubusa ku busa mu minota 90.

Ikipe yo muri Uganda yaherukaga gutwara CECAFA mu mwaka wa 2006 ubwo Police FC yo muri iki gihugu yatsindaga ku mukino wa nyuma Moro United ibitego 2-1.

Ikipe ya KCCA yegukanye igikombe n’ibihumbi 30 USD,AZAM FC ya kabiri yahawe 20,000 USD mu gihe ikipe ya Green Eagles yatsinze AS Maniema Union ibitego 2-0 mu guhatanira umwanya wa 3 yahawe ibihumbi 10 USD.

KCCA niyo yegukanye CECAFA Kagame Cup 2019

Amafoto:IGIHE