Umutoza wa Manchester United Jose Mourinho yashimagije umukinnyi we Paul Pogba witwaye neza mu ikipe y’igihugu y’Ubufaransa akayifasha kwegukana igikombe cy’isi ndetse amusaba ko uko yitwaye muri iryo rushanwa yabikomezanya mu ikipe ya Manchester United akinira.

Sponsored Ad

Mourinho yavuze ko imyitwarire ya Pogba mu Burusiya yari nta makemwa ndetse yifuza ko yazagaruka muri Manchester United ameze neza akamufasha kwigaranzura Manchester City yamuzengereje umwaka w’imikino ushize.

Pogba yakoze ku mutima umutoza Jose Mourinho

Yagize ati “Ndakeka azi impamvu yatumye yitwara neza.Uko yitwaye afasha Ubufaransa gutsinda bikwiriye kumufasha kumenya impamvu ari umukinnyi mwiza ndetse agakomeza kugira uruhare mu gutuma dutsinda.”

Mourinho yavuze ko mu mikino yo gukuranamo aribwo pogba yitwaye neza ndetse ko ubuhanga bwe yazabuzana mu ikipe ya Manchester United iri gukorera imyiteguro ya shampiyona muri USA.

Mourinho yasabye Pogba kuzagaruka muri Manchester United ahagaze neza

Manchester United igiye gukina imikino ikomeye mu rwego rwo kwitegura umwaka w’imikino utaha idafite bamwe mu bakinnyi bayo bakomeye bageze kure mu gikombe cy’isi gusa Mourinho yavuze ko mu cyumweru gitaha Fred baherutse kugura muri Shakhtar Donetsk,David de Gea na Nemanja Matic bazagaruka mu ikipe.