Abasore babiri Muhadjiri na Savio bahesheje APR FC amanota 3 mu mukino w’umunsi wa kabiri wa shampiyona yatsinzemo Musanze ibitego 2-0, imbere y’abafana bayo.

Sponsored Ad

Mu mukino wari witezwe na benshi mu bakunzi ba ruhago mu Rwanda wabereye kuri stade Ubworoherane I Musanze,APR FC yatsinze Musanze FC ibitego 2-0.

Nubwo mbere y’uyu mukino, umutoza Ruremesha Emmanuel yari yakanze APR FC mu magambo yatangarije abanyamakuru,Nshuti Dominique Savio yamutsinze igitego ku munota wa 30 hanyuma Hakizimana Muhadjiri aramusubira ku munota wa 61,nyuma ya Coup Franc nziza cyane yateye iri inyuma gato y’urubuga rw’amahina rwa Musanze.

APR FC FC itsinze imikino ibiri ya mbere ya shampiyona yombi ibitego 2-0 ndetse ubwugarizi bwayo bukomeje kugaragaza ko ari nta makemwa,kuko nta gitego burinjizwa.

APR FC yatwaye igikombe cya shampiyona ubushize,niyo iyoboye urutonde n’amanota 6 kuri 6 ndetse izigamye ibitego 4 muri iyi mikino ya shampiyona imaze gukina.

Musanze FC yanganyije na AS Kigali igitego 1-1 mu mukino ufungura shampiyona,itsinzwe na APR FC bituma benshi bayibazaho cyane ko yiyubatse igura abakinnyi bakomeye n’umutoza Ruremesha Emmanuel.